konka coffee
KONKA

AMAKURU

UKWEZI

Baracyashengurwa no kubura imibiri y’ababo ngo bayishyingure kandi ababishe bahari

Baracyashengurwa no kubura imibiri y’ababo ngo bayishyingure kandi ababishe bahari
16-04-2017 saa 18:56' | By Vincent Nsengiyumva | Yasomwe n'abantu 754 | Ibitekerezo

Bamwe mu bacitse ku icumu bo mu Murenge wa Rusororo mu Karere ka Gasabo, bagaragaza agahinda n’intimba bahorana ku mitima baterwa n’uko batarabasha kubona imibiri y’ababo batazi aho bajugunywe muri Jenocide yakorewe abatutsi ngo babe babashyingura mu cyubahiro.

Ibi babigaragaje kuri uyu wa Gatandatu tariki ya 15 Mata 2017, mu muhango wo kwibuka abatutsi 36,549 bashyinguye mu Rwibutso rwa Ruhanga mu murenge wa Rusororo, ndetse hanashyinguwe indi mibiri 52, irimo 13 yabonetse nyuma y’iyi myaka 23 Jenocide yakorewe abatutsi ihagaritswe, ndetse n’indi itar ishyinguye mu cyubahiro.

Urwibutso rwa Ruhanga kandi ni rumwe mu nzibutso zifite amateka akomeye cyane kandi yihariye, cyane ko ruri mu cyahoze ari urusengero rw’itorero ry’Abangilikani mbere ya Jenocide yakorewe abatutsi bikaza kwemezwa ko rugirwa urwibutso kubera imbaga y’abatutsi yatikiriyemo ubwo bahahungiraga bizeye ko ubwo ari mu ngoro y’Imana ari ntawe utinyuka kubiciramo.

Lev. Pasiteri Emmanuel uhagarariye abafite imiryango ishyinguye mu rwibutso rwa Ruhanga yagaragaje ko abacitse ku icumu bagifite ibibazo by’ingutu birimo kuba abishe imiryango yabo babyiyemereya ariko bakaba batabereka aho babajugunye bityo ngo bahabavane babashyingure mu cyubahiro bakwiye.

Yagize ati “ Haracyari ikibazo kidukomereye cy’abishe imiryango yacu ariko kugeza ubu bakaba batatwereka aho babajugunye ngo tuhabavane tubashyingure mu cyubahiro. Tubonye abacu tukabashyingura mu cyubahiro byatubohora bityo hagakomeza guterwa intabwe igaragara y’ubumwe n’ubwiyunge busesuye urwikekwe abantu bahorana rukavaho.”

Lev. Emmanuel yaboneyeho gusaba Leta n’inzego zitandukanye zrimo amadini n’amatorero gushishikariza abantu bagitsimbaraye ku guhisha aho bazi hose hajugunywe imibiri y’abishwe muri Jenocide, maze nayo igashyingurwa mu cyubahiro.

Umunyamabanga nshingwabikorwa wa Komisiyo ishinzwe kurwanya Jenocide (CNLG), Dr. Bizimana Jean Damascene yavuze ko hakiri bamwe bagihishahisha aho bajugunye imibiri yabo bishe kubera ingengabitekerezo bagifite.

Yagize ati “ Hari abagihisha aho imibiri yajugunywe kubera ingengabitekerezo bagifite.[…] Nitugira amahirwe bazerekana aho iyo mibri iri, nabwo nibatayerekana mwe ababuze abanyu ngo mubashyingure mu cyubahiro muzakomere.”

Mu buhamya butangwa na bake mu baharokokeye bavuga ko Abanyaruhanga babanje kwirwanaho ndetse bagahangana n’Interahamwe zabateraga ziturutse mu duce tubakikije turimo Rwamashyongoshyo, Muyumbu, Gikomero n’ahandi ariko bikananirana.

Interahamwe zabonye binaniranye zitabaza abasirikare, nibwo hoherejwe Aba-GP baza mu mamodoka ndetse n’indege ya gisirikare babirohamo barabarasa, babatera gerenade hanyuma babatwikisha lisansi muri urwo rusengero.

Mu barushyinguyemo, abasaga ibihumbi 25 muribo baguye i Ruhanga naho abandi bavanywe mu mirenge ikikije Umurenge wa Rusororo.

Abiciwe i Ruhanga bashyinguwe bwa mbere ku wa 11 Gicurasi 1995 nyuma yo gukurwa mu cyobo imashini (caterpillar) yari yabatabyemo bamaze kwicwa urupfu rw’agashinyaguro kuwa 15 Mata 1994.


Mu rwibutso rwa Ruhanga hashyinguwe imibiri 52, yiyongera ku 36.549 yari isanzwe ishyinguyemo


Lev.Emmanuel uhagarariye imiryango ifite abantu bashyinguye mu rwibutso rwa Ruhanga yagaragaje agahinda baterwa no kutamenya ahajugunywe imibiri y’ababo

Dr. Bizimana uyobora CNLG yavuze ko abatagaragaza aho bajugunye imibiri y’abantu babiterwa n’ingengabitekerezo bagifite

Perezida w’Inteko Ishinga Amategeko Umutwe w’Abadepite, Donatille Mukabalisa nawe yitabiriye uyu mihango

Umusaza ngaruye warokokeye ku musozi wa Ruhanga yatanze ubuhamya bw’inzira y’umusaraba yanyuzemo Imbaga y’abantu bari baje gushyira indabo ku mibiri y’ababo bashyinguye muri uru rwibutso


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...