konka coffee
KONKA

AMAKURU

UKWEZI

Dr Muligande yagaragaje imvano y’uruhuri rw’ibibazo byashegeshe Kaminuza y’u Rwanda

Dr Muligande yagaragaje imvano  y’uruhuri rw’ibibazo byashegeshe Kaminuza y’u Rwanda
2-10-2017 saa 19:02' | By Vincent Nsengiyumva | Yasomwe n'abantu 3424 | Ibitekerezo 2

Umuyobozi wungirije wa Kaminuza y’u Rwanda ushinzwe iterambere ryayo, Dr Charles Muligande yavuga bimwe mu bibazo by’ingutu biyugarije bikaba ari nabyo bitiza umurindi izahara ry’ireme ry’uburezi rikomeje kugaragara muri iyi Kaminuza.

Kuri uyu wa Mbere tariki ya 02 Ukwakira, nibwo ubuyobozi bwa Kaminuza y’u Rwanda bwitabaga Komisiyo ishinzwe gukurikirana imikoreshereze y’imari n’umutungo by’Igihugu (PAC) kugira ngo bugaragaze imvano y’ibibazo bimaze iminsi muri iyi Kaminuza birimo kudahemba abakozi bayo, ibibazo byo kubura amazi n’umuriro bya hato na hato n’ibindi

Dr Muligande ushinzwe iterambere ry’iyi Kaminuza yavuze ko iyi Kaminuza ifite uruhuri rw’ibibazo bimaze kuyishegesha kuko bimaze igihe kinini anavuga ko byose byatewe n’ibyemezo bikakaye iyi Kaminuza yafatiwe na Leta.

Mu gushimangira imvano y’ibibazo byugarije UR Dr Muligande yatanze urugero rw’uko ubwo yari Minisitiri w’Uburezi amafaranga Leta yajyaga itangira abanyeshuri biga mu mashuri makuru na za Kaminuza zayo mu mashami y’ubuvuzi n’ikoranabuhanga yagabanyijwe ku buryo bukabije kandi aya mashami ahenze cyane.

Ku bigaga ibijyanye n’ubumenyi ndetse n’ubuvuzi Leta yabishyuriraga miliyoni imwe n’igice harimo ibihumbi 250 bitunga umunyeshuri ndetse na miliyoni imwe n’ibihumbi 250 y’ishuri, ku bigaga ibitari siyansi, bakagenerwaga miliyoni imwe n’ibihumbi 250 harimo ibihumbi 250 atunga umunyeshuri n’ibihumbi 950 y’ishuri.

Umwanzuro waje gufatwa w’uko bazajya babaha ibihumbi 600 kuri buri munyeshuri yaba yiga ubumenyi n’ikoranabuhanga cyangwa ibindi nibyo byatumye UR itangira gutakaza imbaraga kugera n’aho kwishyura abakozi bayo bitangiye kuyinanira.

Dr Muligande Charles, yabwiye abadepite ko ibi byose byatewe na MINICOFIN yakomeje kubashyiraho igitutu ibabwira ko bakoresha ingengo y’imari iri hejuru cyane ugereranyije n’iyo Kainuza zigenga zikoresha.

Yagize ati “[….] Buri iteka iyo twajyaga kwerekana ingengo y’imari yacu, wasangaga Minisiteri y’Imari n’Igenamigambi (MINECOFIN) itubwira ngo ariko kuki mwe mwaka amafaranga menshi kandi ULK yo yaka make kandi igashobora kubaho? Tukagerageza kubasobanurira tukababwira duti nyinshi muri izo kaminuza mutugereranya na zo, nta n’imwe yigisha ubuvuzi, nta yigisha Civil Engeneering, ibyo ni ibintu bihenda cyane.”

Yavuze hashobora kuba hari Minisitiri waje kurangara, bamubwira kugabanya amafaranga akabyemera, bigatuma Kaminuza ihura n’ibibazo bikomeye iri kurwana nabyo ubungubu.

Yagize ati “Icyaje kuba rero, icyo numva, icyo gitutu cya Minecofin cyahoraga iteka ngo muyagabanye, hashobora kuba haraje Minisitiri mu biganiro ararangara, bamubwira ngo bamuhe ibihumbi 600, arabyemera.”

Yakomeje agira ati “Bitangira gupfa gutyo, UR iratangira irahagorerwa , mu by’ukuri mu mwaka wa mbere wa 2015-2016, icyatumye ipfa kubaho gatoya ni ko mu mafaranga yari ifite harimo amafaranga angana na miliyari 8, niyo yatumye umwaka urangira”.

Dr Muligande avuga ko byageze aho za miliyari zirashira isigara nta yandi mafaranga ifite bituma uruhuri rw’ibibazo rutangira kuyishegesha kugeza ubwo abakozi ba Kaminuza batangira kugira ibirarane by’imishahara kandi bikaba byaranakomeje kubakurikirana.

Umunyamabanga Uhoraho muri Minisiteri y’Uburezi, Sam Mulindwa, yavuze ko mu nama y’abaminisitiri iherutse babasabye gukora igenzura, bakazakora raporo y’ibyo kaminuza y’u Rwanda ikeneye byose byateza imbere ireme ry’uburezi.

Leta yageneraga Kaminuza y’u Rwanda miliyari zigera kuri 17 , bingana na 65 % y’ingengo y’imari ikoresha hanyuma amafaranga asigaye UR ikayishakamo.

Mu ngengo y’imari ivuguruye, Mulindwa yabwiye abadepite ko bashaka ko ingengo y’imari ya Leta iva kuri miliyari 17, ikagera kuri miliyari 26 kugira ngo nibura amafaranga yo guhemba abakozi aboneke.


INKURU ZA :
Tanga Igitekerezo
Ibitekerezo 2
TUYISHIME OLIVIER Kuya 7-10-2017

GUKUBITA UMUNTU AKARINDA GUPFA NTIBIKWIYE MUBANYARWANDA. TWESE. DUKWIYE KWISUBIRAHO NTIBIKWIYE PE.

TUYISHIME OLIVIER Kuya 7-10-2017

GUKUBITA UMUNTU AKARINDA GUPFA NTIBIKWIYE MUBANYARWANDA. TWESE. DUKWIYE KWISUBIRAHO NTIBIKWIYE PE.

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...