konka coffee
KONKA

AMAKURU

UKWEZI

Hibutswe imiryango yazimye muri Jenoside, isaga 7700 imaze kubarurwa mu turere 17

Hibutswe imiryango yazimye muri Jenoside, isaga 7700 imaze kubarurwa mu turere 17
28-05-2017 saa 16:58' | By Vincent Nsengiyumva | Yasomwe n'abantu 1360 | Ibitekerezo

Umuryango w’abahoze ari abanyeshuri ba Kaminuza barokotse Jenoside yakorewe Abatutsi mu Rwanda (GAERG) bibutse imiryango isaga 886 yazimye muri Jenoside yakorewe Abatutsi mu turere twa Rubavu,Nyabihu na Rutsiro, banagaragaza ko mu bushakashatsi bakoze mu turere 17 tw’u Rwanda habaruwemo imiryango 7797 yazimye yari igizwe n’abantu basaga 34,823.

Mu ijoro ryo kuwa Gatandatu tariki ya 27 Gicurasi 2017 nibwo urubyiruko rwa GAERG rufatanyije na bamwe mu baturage b’akarere ka Rubavu bunamira inzirakarengane zishyinguye mu rwibutso rwa ’Komini Rouge’ maze baganirizwa ku mateka akomeye yabereye muri aka karere ndetse no mu tundi duce duhana imbibe na Rubavu.

Mu turere 3 Rubavu,Nyabihu na Rutsiro hakozwemo ubushakashatsi ku miryango yazimye birangira hagaragajwe ko imiryango 886 yari igizwe n’abatutsi basaga 4200 bishwe bose ntihagira n’uwo kubara inkuru urokoka.

GAERG yihaye intego yo gukora amabarura mu gihugu cyose bashakisha imiryango yazimye kugirango imenyekane nayo ijye yibukwa, ubu bakaba bamaze kubarura mu turere 17 habaruwemo imiryango 7797 yazimye yari igizwe n’abantu basaga 34,823 hakaba hasigaye utundi turere 13 natwo tugiye gukurikiraho.

Perezida wa GAERG, Olivier Mazimpaka yavuze ko kwibuka imiryango yazimye ari inshingano z’uru rubyiruko cyane ko iyi miryango nta muntu uba wararokotse wayibuka.

Yagize ati " Iyo umuntu yitabye Imana uwasigaye ni we wita kuri gahunda zose zo gushyingura, no kumwibuka, bariya rero nta wabo wasigaye ngo ajye abibuka ariko ntibazazima turiho, nitwe duhari kugira ngo tubibuke, tubahe icyubahiro bambuwe."

Yakomeje avuga ko iyo bibuka bataba bibuka abishwe gusa ko ahubwo baba banibuka ibyiza bari kuzageraho,abana ndetsen’abuzukuru bari kuzabyara maze nabyo bakabiha icyubahiro cyabyo.

Mazimpaka kandi yanaboneyeho gusaba umuntu wese waba agifite amakuru y’ahajugunywe abantu muri Jenocide ko yahavuga maze nabo bagashyingurwa mu cyubahiro.

Yagize ati “Turagira ngo tubwire abatwiciye abacu ko turiho, ntitubasaba byinshi, icyo tubasaba gusa ni ukutwereka abacu tutazi aho bajugunywe maze tukabaherekeza tukabashyingura mu cyubahiro."

Ibikorwa byo kwibuka imiryango yazimye byatangiye ku itariki ya 06 Kamena 2009 bibera i Ntarama mu Karere ka Bugesera maze ku nshuro yakurikiyeho mu 2010 byakorewe ku rwibutso rwa Murambi ruri mu Karere ka Nyamagabe.

Mu mwaka wa 2011 iyi mihango yaberere i Karongi; mu 2012 bibera i Nyanza ya Kicukiro; mu 2013 byabereye ku rwibutso rwa Kiziguro rwo mu Karere ka Gatsibo; mu 2014 bibera i Busogo mu Karere ka Musanze; mu 2015 bibera i Kinazi mu Karere ka Ruhango; mu 2016 bibera ku Rwibutso rwa Jenoside rwa Kigali ku Gisozi naho ku nshuro ya cyenda byabereye muri Rubavu.

Visi Perezida w’Inteko Ishinga Amategeko, Umutwe wa Sena, Jeannne d’Arc Gakuba yashimye igikorwa kiza GAERG yatangije cyo kubarura imiryango yazimye mu gihugu cyose aho yashimangiye ko ari bimwe mu bizadufasha gusigasira amateka yacu tuyabika neza kandi yuzuye.

Visi Perezida w’Inteko Ishinga Amategeko kandi yanagarutse ku kibazo cy’ingengabitekerezo kigihangayikishije igihugu aho yagaragaje ko abana bato batanabonye Jenocide aribo bafite umubare munini w’abagaragaraho ingengabitekerezo ya Jenocide maze anashimangira ko bayigishirizwa ku ishyiga na bamwe mu babyeyi babo bagifite imyumire nk’iyo.

Yagize ati “Abana bo mu mashuri abanza n’ayisumbuye baracyagaragaza ingengabitekerezo ya Jenocide haba mu mvugo cyangwa no mu nyandiko ku mpapuro (tracte).Birigaragaza ko abenshi babyigishwa n’ababyeyi babo ku ishyiga.”

JPEG - 177.4 kb

Visi Perezida wa Sena, Jeannne d’Arc Gakuba acana urumuri rw’icyizere

Umuhango wo kwibuka imiryango yazimye muri Jenoside yakorewe Abatutsi wabereye i Rubavu

JPEG - 131.3 kb

Mazimpaka Olivier uyobora GAERG yasabye abakoze Jenocide gutanga amakuru y’aho bajugunye imibiri


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...