konka coffee
KONKA

AMAKURU

UKWEZI

Menya impamvu zatumye inyungu za Bralirwa n’iz’abanyamigabane bayo zijya hasi cyane

Menya impamvu zatumye inyungu za Bralirwa n’iz’abanyamigabane bayo zijya hasi cyane
10-08-2017 saa 12:38' | By Chief Editor | Yasomwe n'abantu 8208 | Ibitekerezo 16

Mu mwaka ushize wa 2016, inyungu ya Bralirwa yagabanutseho 68%, igera kuri miliyari 2 na miliyoni 670 z’amafaranga y’u Rwanda ivuye kuri miliyari 8 na miliyoni 250 z’amafaranga y’u Rwanda yabaraga muri 2015. Aha habarwaga inyungu zitaravamo imisoro. Ibi kandi, iri gabanuka ry’inyungu ryanagize ingaruka ku nyungu z’imigabane yayo kuko yavuye kuri 6,91 muri 2015 ikagera kuri 1,36 muri 2016.

N’ubwo Bralirwa yavuze ko ibi byatewe n’impamvu zishingiye ku kuzamuka kw’ibiciro by’ibinyobwa byayo riherutse kuzamukaho 9%, hari izindi mpamvu zigaragaza imvano yo kugabanuka kw’igipimo cy’ubucuruzi bw’iyi Kompanyi yenga inzoga n’ibinyobwa bidasembuye mu Rwanda, ari nazo tugarukaho muri iyi nkuru.

1. Gusigara inyuma mu guhanga udushya no kunezeza abakiliya

Uruganda rwa Bralirwa, rumaze imyaka 58 rukorera mu Rwanda, aho rukora rukanacuruza ibinyobwa bidasindisha n’inzoga nka Primus, Mutsig, Amstel n’izindi nka Heineken rucuruza ariko zakorewe mu mahanga. Ntabwo uru ruganda rwagiye rugaragaza impinduka no guhanga udushya cyane, kuko ugereranyije na Skol imaze imyaka micye ikorera mu Rwanda, usanga Bralirwa yarasigaye inyuma mu guhanga udushya. Urugero, Skol yazanye ubwoko bwinshi butandukanye bw’inzoga zabo kandi zigiye ziri mu macupa afite ibipimo bitandukanye, bashyiraho n’akarusho k’uko inzoga zabo nyinshi zishobora kuboneka no mu dukombe dupfundikirwa, bityo umukiliya akaba ashobora kugura izi nzoga zabo no mu gihe adashaka kuguma aho aziguriye, kuko utwo dukombe two tudasubizwa nk’uko bigenda ku macupa.

JPEG - 120.7 kb

Ubu iyo ugeze mu tubari twinshi dutandukanye, ubona umubare munini cyane w’abanywa inzoga, baba binywera ibinyobwa bya Skol, kandi nabo ugasanga baranywa ibitandukanye bigendanye n’ibyo bumvamo uburyohe kuko habaho ubwoko bwinshi bw’inzoga z’uru ruganda rwaje ruzi ko rugomba gukoresha imbaraga nyinshi rugahangana ku isoko na Bralirwa.

2. Gusubira inyuma cyane mu bijyanye n’iyamamazabikorwa

Mu myaka yashize, uruganda rwa Bralirwa rwagiye rugaragara mu bikorwa byo kwamamaza inzoga zabo, babicishije mu mikino n’imyidagaduro, ariko aha naho uruganda rwa Skol rwabaciye mu rihumye rubatsinda ibitego bibiri byiza. Bralirwa, ibicishije mu kinyobwa cya Primus, mu minsi yashize yateraga inkunga shampiyona y’igihugu y’umupira w’amaguru, bivuga ko ku bibuga na sitade zitandukanye, wasangaga ibinyobwa byabo ari byo gusa byemerewe gucuruzwa, kandi umupira w’amaguru ni kimwe mu byitabirwa cyane mu Rwanda. Ibi ariko rwaje kubihagarika, shampiyona ihagarika kwitwa Primus National League ahubwo ihabwa Azam, ariko Skol nayo iba yabibonye kare, ihita itera inkunga ikipe ya Rayon Sports. Ikipe ya Rayon Sports ifite umubare munini cyane w’abafana, abatayifana ni abakeba bakomeye nabo bayikurikirana, bisobanura ko ibikorwa n’ibicuruzwa by’uruganda rwa Skol bikurikirwa cyane kubera ikipe ya Rayon Sports. Uretse n’ibyo kandi, hari abafana b’inkoramutima za Rayon Sports batangarije ikinyamakuru Ukwezi.com ko bavuye ku nzoga za Bralirwa bakiyemeza kuzajya banywa iza Skol kuko ari uruganda rushyigikira ikipe yabo.

JPEG - 328.1 kb

Ubu aho Rayon Sports iri na Skol iba ihari

Uruganda rwa Skol kandi ntirwarekeye aho, kuko ari n’umuterankunga ukomeye wa Tour du Rwanda, kandi muri iki gihe umubare munini w’abanyarwanda bakunda bakanakurikira cyane ibijyanye n’isiganwa ry’amagare dore ko n’u Rwanda rumaze imyaka rubyitwaramo neza cyane mu ruhando mpuzamahanga. Uretse kuba Skol yamamaza muri Tour du Rwanda, inabona uburyo bwo gucuruza cyane ibinyobwa byayo, nabyo bikaba inzira ikomeza gutuma bigarurira abahoze ari abakiliya ba Bralirwa.

JPEG - 215.5 kb

Bralirwa kandi yari yanateye intambwe mu kwamamaza no gucuruza ikinyobwa cya Primus binyuze mu myidagaduro, mu cyiswe Primus Guma Guma Super Star. Urebye uburyo iri rushanwa ryari rihagaze mu myaka ishize ukareba n’uko ryagenze mu myaka ibiri ishize, ubona ko aho gutera imbere hagenda hazamo gucika intege, umubare munini usanga utagishishikajwe cyane n’aya marushanwa. Kuba ibyagiye biva muri aya marushanwa nabyo benshi babifata nk’ibirimo amanyanga no kubera, byagiye bituma icyari ukwamamaza ibikorwa n’ibinyobwa bya Bralirwa, gihinduka nko kubyangisha bamwe, dore ko hari n’abahitaga bivugira ko batazigera bongera kunywa ibyo binyobwa.

JPEG - 356.8 kb

Ibi byose byagiye binatuma Bralirwa nayo igabanya bigaragara uburyo yabishoragamo imari. Urugero, abanyamakuru bagendaga bamamaza cyane ibikorwa bya Bralirwa, batwarwaga mu mamodoka y’uru ruganda, uyabonye wese akabyibwira, bakanagenera abo banyamakuru uburyo bwo kubaho mu gihe bari mu marushanwa, bakabacumbikira aho bagiye kure y’umujyi wa Kigali, bakabagaburira mu gihe barimo kubakorera n’ibindi byari uburyo bwo kubafasha kunoza akazi kabo. Nyamara ibi Bralirwa yagiye ibikuraho, kuko mu myaka ibiri iheruka abanyamakuru bitegeraga bakanigaburira ndetse n’abayobozi b’ibitangazamakuru bamenyeshejwe ko nta bushobozi bwo gukomeza kubatwara mu modoka, kubacumbikira no kubagaburira buhari. Ikindi kandi amafaranga yahabwaga abahanzi ndetse n’igihe bamaraga barushanwa nabyo byaragabanutse bigaragaza ko Bralirwa yagabanyije ayo yashoragamo.

3. Kuzamura ibiciro by’ibinyobwa byatumye abakiliya bayoboka umukeba

JPEG - 66.5 kb

Ibinyobwa bisembuye n’ibidasembuye bicuruzwa n’uruganda rwa Bralirwa, byagiye bizamurirwa ibiciro bityo bituma bamwe mu bakiliya babyinubiye banzura kubireka bakayoboka ibinyobwa by’uruganda rwa Skol, cyane ko rwo nta zamuka rya hato na hato ry’ibiciro ryigeze rikunda kubaho. Ibi nabyo byagize uruhare mu gutuma umubare munini w’abakiliya bahoze ari aba Bralirwa bayivaho, nabyo bigira uruhare mu kuba uru ruganda rwarabuze igice kinini cy’inyungu rwabonaga.

NB: Iyi nkuru ishingiye ku bitekerezo bwite by’umwanditsi ashingiye ku isesengura rye


INKURU ZA :
Tanga Igitekerezo
Ibitekerezo 16
Economist Kuya 24-08-2017

Mbanze ngushimire Munyamakuru, wagize igitekerezo cyiza gusa biriya wavuze nibicye cyane. Plz for more info uzagerageze uvugishe impuguke mubijyanye nubukungu muri universities cy researchers.

Rwena Kuya 17-08-2017

Ndashimira umunyamakuru kuri iyi nkuru ye. Gusa byari kuba byiza iyo aza kubaza amakuru yizewe , kuko we arebera inyuma. Nkora muri bralirwa reka nguhe amakuru yizewe.

1. Muri iyi myaka ibiri itatu ishize , Bralirwa yaguye uruganda rwayo I kigali n igisenyi. Kigari hubatswe uruganda rushya rwa Fanta . na Ligne nshya ya PET. ( Uducupa twa Plastique) naho Gisenyi ni Ligne nshya ifite ubushobozi bunini. Ibyo rero byasabye ko Ifata inguzanyo, mu rwanda ( BK) ndeste no hanze. inyungu rero ntizaba zimwe hishyurwa izo nguzanyo.
2. Ibiciro koko byariyongereye ku isoko. Kubera ko Bralirwa itumiza ibintu byibanze mu ma dorari kandi ifarnanga ry urwanda ryagize inflation. byatumye biduhenda.

Ibindi umunyamakuru yavuze byo guhanga agashya nabyo bibaho, gusa hagiye habaho propagande itari nziza zibeshya , ko Skol nta Sukari igira. bituma benshi bayivaho. Ntabwo Bralirwa ikora Propangande zibeshya. nkubu dufite inzoga twenga nta Sukari dushyizemo ( no suger added) ariko ntitwakwihandagaza ngo tubeshye ko nta sukari irimo kuko tuba tuzi ko ibyo yenzemo biyifite. Mubyukuri nta sukari nta alcohol yabaho, nta sukari nta fermantantion yabaho. So izo propagande zo ntizemewe.

Uko biri kose, munyamakuru uzaze ukore iri perereza. urebe Qualite y’inzoga zacu. Hanyuma ugereranye niza mukeba. Ubaze neza nta bintu by ibituburano twengesha, urebe igihe zimara uzabona ko ibiciro byacu bikiwye kubera ko dushyira imbere QUALITY. Abanywa iza Mukeba muzamenya ibyabo mu myaka icumi iri mbere . Twe dufite abanyweye Primus guturuka 1959. So please be informed from us.

izindi point zawe za Innovations na Visibilite , koko skol yakoze byinshi. nubwo tutazi niba twabishima. Ex. Gufata Rayon sport byari gahunda yo gutambamira sporsoship ya Bralirwa muri ferwafa . Nibyo se ushima!!!

Heineken idusaba kuba World class company, bituma hari ibyo tudakora.

Wakoze kandi kuduha ishusho y uko ubibona . Urebeye Inyuma.

KASIRE ELIE Kuya 16-08-2017

Ubundi fanta kimwe n’ibindi binyobwa bidasembuye bikorwa na BRALIRWA ntibyakagobye kurenza amafarananga 250 ku icupa ’ kuburyo utanga 500 ukanywa amacupa abiri. Ubundi mbere yokuzamubura ibiciro bajye babanza barebe poiuvoir d’achat(purchase power ) y’umukiriya ndavuga umunyarwanda muri rusange.

Nasabaga SKOL gushyira ku isoko ibinyobwa bidasembuye ariko bidahenze kuburyo icupa ritarenza amafaranga 250 maze murebe ngo turahana BRALIRWA izamura ibiciri uko yishakiye .

Erega binonjyeye ibinyobwa bya Bralirwa ,uretse no kuba bisigaye binahenda , banabyambuye umwimerere wabyo byahoranye.

VIVE SKOL .

EMMANUEL Kuya 15-08-2017

muraje mubone ibibazo skol ifite>
skol nayo ibibazo irabifite byinshi ahubwo nuko bitarajya ahagaragara kuko nticuruza uko bikwiye kubera mukeba

rukara Kuya 15-08-2017

BRALIRWA IFITE IKIBAZO GIKOMEYE AHUBWO IZANAHOMBA BIRANGIRE NIBA IKOMEJE KWITWARA UKO BIMEZE . IKIBAZO CYINGENZI GIHARI NUKO IBINYOBWA BYAYO (MUTZING, PRIMUS, AMSTEL N’IBINDI...) BISIGAYE BIKORWA MU BIGORI(MAIS) KANDI MBERE MUTZING YAKORWAGA MU MASAKA, PRIMUS IGAKORWA MU NGANO NONE BYOSE BABIGIZE IBIGORE.
AHUBWO NIMUTAZITONDERA MUZAHUMA (AVEUGLE) . IZONGA ZABRALIRWA ZASIMBUYE KANYANGA . NONEHO BAKORA NIKOSA RYO KONGEZA IGICIRO.
ABAKOZI BAYO NABO SISHYASHYA MU MYITWARIRE BABAYE BA BOSS

Manzi Kuya 14-08-2017

Gasana nawe muzungu ibyo nabyita kuba contre succès. Naho ubundi nta mwana usya aravoma.
BRALIRWA yatubaye hafi kuva muri za 50 murukundo n’ubunyangamugayo.
Mutzig Lite usibye abatayizi nibo bayivuga ibidahwitse. Iraryoha, Nta mavunane, ni inzoga pe, icyampa nkajya nyibona hafi.

Ese muheruka gusoma ngo mwumve inyungu Bralirwa yagezeho ? ibintu ni uburyohe.

Titi Kuya 11-08-2017

Uyu munyamakuru ndamweye. Nari ntegereje kureba ko agaragaza ko ari ibitekerezo bye bwite. Kuko, nahereye hejuru nsoma nibaza niba Bralirwa yatinyuka gushimagiza umukeba wayo kdi ntibibaho muri concepts za marketing. Skol marketing yayo iteye ubwoba, utabyemera ajye yitegereza aho bamanika ibyapa byabo, eg nka rwandex wabishaka utabishaka kiriya cyapa urakibona. Ikindi, iyo urebye mutubari amaso araguha, market share ya skol iri hejuru.

GASANA Kuya 11-08-2017

Rwose birakwiye ko bralirwa yisubiraho ikareka kuzana ibintu nk bya Huzagurika (HUZA) ni cyakindi kikinywabarezi (Mutzig LITE).
Ese ibyo ni ibiki????????????????

MAMBO KANEZA Kuya 11-08-2017

Niba umuntu yaramaze imyaka irenga 10 kuzamura yinywera ibinyobwa bya BRALIRWA hayunya SKOL yaza agahita ayiyoboka hari icyo bivuze.ibinyobwa bya BRALIRWA bigenda bita umwimerere wabyo.Muzumve ibyo baba bagurisha muri PGGSS ukuntu biba bibishye.wowe wavuze ngo mu bukwe banywa ibya BRALIRWA keretse niba ari FANTA gusa uvuga

Yumba kadase Kuya 11-08-2017

Ureste nibyo,Bralirwa yagiye yirukana mu myaka ibiri ishize abakozi bayo binararibonye ikabasimbuza abana bato bavuye kwishuli.Hanabaye ikyo umuntu yakwita ihohoterwa kuko abagiye birukanwa,nta nteguzwa cyangwa imperekeza bahabwe ahubwo bagiye babwira yuko"performances" zabo atali nzinza. Ako karengane ntagbo kapfa kubahira,kandi nabarimo ubu bafite impungenge zo kwirukanwa. Bralirwais down for sure.

gakuru Kuya 11-08-2017

bamwe mu bashinzwe marketing muri Bralirwa bibereye muri business zabo ,gutanga intebe,ameza,nibindi bikoresho byajemo ruswa ikomeye ,Niyo mpamvu skol yabanyuze mu rihumye.muzatubarize delegue Wa Kinyinya icyo akora ntacyo peeeee

Yasm lax Kuya 10-08-2017

Tuzanywa skol ntakibazo

Yasm lax Kuya 10-08-2017

Tuzanywa skol ntakibazo

Nyangabo Kuya 10-08-2017

Inzoga za Bralirwa zigenda zita umwimerere. Mutzig yo muri 2000 itandukanye n’iyu yu munsi kure, kimwe na primus na Fanta. urazinywa mu gitondo hangover n’ingoma mu mutwe bikaba byinshi. Ikindi cyabiteye batubwira ko muri skol nta sukari akaba ariyo mpamvu abihaye(abasanzwe baranywa cg bigurira inzoga) twayobotse skol, ipfa nayo kutazadutenguha.

Cherubin Kuya 10-08-2017

Ikibazo jye mbona ntabwo ari Skol nubwo nyavuga ko ihali! Kuko iyo urebye imyaka imaze itarigarurira abaguzi benshi ahubwo usanga imyaka izaza ishobora kuzayigora! Ngaho uzagenzure ibirori bibera mu Rwanda niho uzabonera ko ibinyobwa bya Bralirwa bifite abakunzi benshi mu Rwanda. Ahubwo ikibazo ni izamuka ry’ibiciro rikiyongeraho ko ingufu zo guhaha kw’isoko zagabanutse kubw’ibikenewe byinshi ku muturage ugura ! Buriya na Skol ifite ibibazo by’ingungu nkeya nuko iyo uri mushya uba utarmenya gutandukanya urwunguko urwunguko n’igihombo! Tegereza uzambwira.

lg Kuya 10-08-2017

Abantu bose bakurura, bishyira, mwaryaga, Aya banyamigabane gusa ikibazo si skol, ikibazo nigiciro,

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
BAHO
INKURU ZIKUNZWE
Ibitekerezo
Loading...
IZINDI NKURU WASOMA
Loading...