konka coffee
KONKA

AMAKURU

UKWEZI

Ngororero: Bararira nyuma y’uko amafaranga yarishywe n’uwabatekeye umutwe yatwawe na Leta

Ngororero: Bararira nyuma y’uko amafaranga yarishywe n’uwabatekeye umutwe yatwawe na Leta
31-05-2017 saa 09:12' | By Muhizi Olivier | Yasomwe n'abantu 3858 | Ibitekerezo

Abahinzi b’ingano bo muri Koperative ya KABKM mu murenge wa Kabaya mu karere ka Ngororero bararira ayo kwarika nyuma yo gutekerwa umutwe n’umuntu w’umumamyi wiyitaga umukozi wa Kompanyi irangura imyaka akabatwara umusaruro w’ingano ubarirwa mu gaciro k’amafaranga y’u Rwanda 5 450 000 nyuma akaza kuburirwa irengero, aho afatiwe agacibwa ihazabu ariko amafaranga yose yaciwe akaba yarashyizwe mu isanduku ya Leta bo ntibaboneho na macye.

Aba bahinzi bibumbiye muri koperative KABKM (Koperative y’Abahinzi-Borozi mu Kagari ka Mwendo) y’abahinzi b’ingano bavuga ko intandaro y’ibibazo byo guhora bibwa ari uko nta soko rihamye bagira bikabatera kugurisha umusaruro wabo n’abamamyi (abaguzi b’umusaruro batemewe) bigatuma babagurira ku biciro byo hasi cyangwa se bakanabambura.

Aba bahinzi bavuga ko mu kwezi k’Ukwakira 2016 aribwo haje umuntu wiyitiriraga Kompanyi irangura umusaruro w’abahinzi maze abatwara toni icyenda z’ingano bari bejeje zabarirwaga mu gaciro k’amafaranga y’u Rwanda 5.450.000, bagirana amasezerano y’uko azabishyura mu byiciro hanyuma aragenda guhera ubwo ntibongera kumuca iryera.

Ingano ni kimwe mu bihingwa byera i Kabaya muri Ngororero

Habimana Jean Damascene uyobora iyi koperative ya KABKM avuga ko bahombye bikomeye kubera ubu bwambuzi bakorewe, ndetse ngo byanatumye babura amafaranga yo kugura imbuto mu gihembwe cy’ihinga cyakurikiyeho guhinga barabireka.

Aba bahinzi ariko banavuga ko umwe mu bari babatekeye umutwe yaje gutabwa muri yombi agahamwa n’icyaha maze agahabwa igihano cyo gufungwa imyaka itatu no gutanga ihazabu y’amafaranga angana na Miliyoni eshatu.Gusa ariko ngo n’ubwo uyu mwambuzi yaciwe iyo hazabu, ngo ntibarumva neza impamvu yashyizwe mu isanduku ya Leta mu gihe bo bambuwe nta na macye bagenewe ngo agabanye igihombo bagize cyangwa azibe icyo cyuho kuri bamwe.

Umukozi ushinzwe ubuhinzi n’ubworozi mu murenge wa Kabaya, Fulgence Ndikubwimana, avuga ko ikibazo cy’aba bahinzi cyagejejwe mu nkiko akaba abizeza ko kiri gukurikiranwa neza kandi ko kizakemuka neza ntawe ubangamiwe.

Ndikubwimana ati: "Ubusanzwe abanyamuryango ba Koperative tubafasha gushaka amasoko ndetse hari n’igihe RAB iza ikazibagurira ndetse na AZAM nayo yemeye kujya itugurira ingano ariko ukuntu aba bo bashutswe n’umutekamutwe batazi sinzi...".

Uyu muyobozi yanaboneyeho gusaba aba bahinzi kuba maso no kutazajya bagurisha n’uwo babonye wese kugira ngo batazongera gutekerwa umutwe n’abajura bakabacucura utwabo.

Yagize ati “Ndabasaba kujya bashishoza mbere yo kugira undi muntu bagirana nawe amasezerano kuko byabateza akaga... Biriya bigomba kubaha isomo kuko bariya bahinzi bagiranye amasezerano n’abantu ubuyobozi butabizi. Ntabwo bazongera kubikora ndetse n’ab’ahandi barabimenye. Ibi byaradufashije mu kubabwira ko batagomba kujya bagurisha n’abantu bose babonye.”

Aya ni amaterasi y’indinganire ahingwamo ingano


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...