konka coffee
KONKA

AMAKURU

UKWEZI

Uwari Burugumesitiri wishe nyina wa Padiri Ubald ashobora gutangira kumufasha kwigisha

Uwari Burugumesitiri wishe nyina wa Padiri Ubald ashobora gutangira kumufasha kwigisha
29-05-2017 saa 13:19' | By Chief Editor | Yasomwe n'abantu 12908 | Ibitekerezo 7

Padiri Ubald Rugirangonga amaze kwamamara mu Rwanda no hanze kubera impano idasanzwe afite yo gusengera abarwayi bagakira ubumuga butandukanye n’indwara zikomeye ziba zarananiye abaganga b’inzobere. Uretse ibyo ariko, anazwiho kugira uruhare mu kwigisha abanyarwanda ubumwe n’ubwiyunge, ibintu akora yihereyeho kuko yabashije kubabarira abamwiciye umuryango muri Jenoside, uwishe nyina akaba aherutse no gufungurwa agasanga Padiri Ubald yararihiriye amashuri abana be, inyiturayo uyu muvugabutumwa amwifuzaho ikaba ari iy’uko yaza bagafatanya kwigisha umuryango nyarwanda.

Jenoside yakorewe abatutsi mu Rwanda mu mwaka w’1994, yabaye Padiri Ubald ari umupadiri muri Paruwasi ya Nyamasheke, n’ubwo nyuma yaje kwimurirwa muri Paruwasi ya Mushaka, ndetse nyuma anahabera Padiri mukuru kuva mu 1999.

Se yishwe mbere ya Jenoside yo mu 1994 azizwa ubwoko bwe, ndetse icyo gihe nibwo Padiri Ubald nawe yaje guhungira mu mahanga nyuma yo gutotezwa azira ubwoko, ariko akaza kugaruka mu Rwanda nyuma yo kumva ijwi ry’Imana rimusaba kuza kwigisha urukundo abanyarwanda. Mu 1994 nyirizina, Jenoside yavukije Padiri Ubald nyina n’abandi benshi bo mu muryango we, nyamara abamwiciye yaje kubababarira, ndetse arihira amashuri abana babiri; umuhungu n’umukobwa b’abamwiciye umuryango muri Jenoside.

JPEG - 56 kb

Mu kiganiro kirambuye Padiri Ubald yagiranye n’ikinyamakuru Ukwezi.com, yadutangarije ko gahunda y’ivugabutumwa rigamije kwimakaza ubumwe n’ubwiyunge nyabwo amaze igihe akora, hari abatayiyumvamo kuko bakiboshywe n’amateka. Yavuze ko hari abahutu bakiyumvamo Parmehutu, hakaba n’abatutsi bahahamutse kuburyo bahorana ubwoba budashira.

Padiri Ubald ati: "Erega iki kibazo cyacu cy’aya mateka, harimo abantu bagitinya kuko iyo uvuze ngo Parmehutu yavangiye ivanjiri, abantu bose bahita bahahamuka., kandi nibyo, yavangiye ivanjiri kuri njyewe. Sinzi ubwoko bwawe sinkuzi ariko ukuri imbere yanjye kuba ari ukuri. Ube umuhutu, ube umututsi, ukuri ni ukuri. Uko njye mbibona, hari abahutu bibona muri Parmehutu benshi cyane kandi birababaje, hakaba n’abatutsi Parmehutu yahahamuye. Abatutsi bahahamuwe na Parmehutu nabo rero, batinya kugira icyo bavuga ku kibazo cy’amoko ngo tugitere hejuru kive mu nzira…"

Padiri Ubald akomeza agira ati: "Abatutsi bahahamutse batinya Parmehutu, abahutu bamwe benshi bakayibonamo, ako ni akavuyo nshaka ko kava mu nzira hakaba abantu b’abakirisitu, kuko usanga abatutsi bamwe yahahamuye mu mutima, kandi koko birumvikana, niba yarakwiciye abantu, yarakubujije kwiga… hari ubwoba bupfuritse ugatinya kubivuga, kwinjira mu mateka bikakunanira, n’ubivuze agahahamuka. Abahutu benshi, baba abapadiri baba abaki, usanga bari kuyibonamo. Ugasanga rero biravangavanze neza neza, kandi hagomba kuboneka abantu bari free (babohotse) imbere y’Imana."

JPEG - 220.8 kb

Padiri Ubald yagaragaje ko hari abantu bagitsimbaraye ku by’amoko, hakaba abananiwe gusaba imbabazi babikuye ku mutima ndetse hakaba n’abananiwe kubabarira, nyamara we ibintu nk’ibyo ngo yumva yarabirenze akabasha kubabarira, kuburyo mu bo yababariye harimo uwamwiciye abo mu muryango we barimo n’uwishe nyina, nyuma yo kumubabarira akaba yaranarihiye amashuri abana be.

Aha Padiri Ubald yagize ati: "Njye numva rero nk’umuntu w’umu Charismatique ibyo bintu narabirenze, nta muntu nshobora kwanga, umuntu wese mubonamo ishusho y’Imana, ni uko nabohotse... Njye aho nageze, buri wese ni ishusho y’Imana imbere yanjye, n’uwishe mama naramubabariye, ndihirira amashuri abana be, nawe aherutse no gufungurwa, yari Burugumesitiri, kuko yaburanye yemera icyaha baramufunguye, ubu ngiye kuzamukoresha dukorane. Niba waransabye imbabazi ubikuye ku mutima, nawe uraza umfashe twigishe... Umugore we yapfuye akiri muri gereza, abana be ndabarihira, afite umukobwa we wiga Medecine ni njyewe umurihira, mu minsi micye araba yabaye Dogiteri."

Padiri Ubald avuga ko n’ubwo atarabonana n’uwamwiciye umuryango we, ngo ateganya kumushaka bakaganira akamusaba ko amufasha kwigisha. Yagize ati: "Afunguwe yaranterefonnye, ariko anterefona ngiye kujya i Yeruzaremu, navuyeyo ejobundi ubu sindatuza, nimara gutuza nicaye nibwo nzamuhamagara tukaganira, nkamubaza niba afunguwe, icyo agiye kumarira sosiyete. Ni uko njyewe numva ngombwa gukoresha abantu. Urafunguwe, wansabye imbabazi, ko naziguhaye, urabona impuhwe nakugiriye, none ugiye kumfasha iki muri sosiyete? Ni uko njyewe nkorana n’abantu. Aze atange ubuhamya bw’uko abona ibintu, atange ubuhamya bw’uko namufashirije abana, noneho atange ubuhamya bw’ubumwe n’ubwiyunge, nawe yigishe. Kuko urumva yari burugumesitiri, ni umunyepolitiki azi icyo yakwigisha."

Padiri Ubald akomeza agira ati: "Yari Burugumesitiri wa Komine Karengera y’iwacu aho mvuka ariko njyewe sinari namuzi. Mubona bwa mbere avuga ko ansabye imbabazi sinari muzi, nibajije uwo ari we, ariko noneho kuko nigishaga gutanga imbabazi no gusaba imbabazi, narabibashije… Kubivuga birakomeye cyane, akibimbwira byarandenze ndarira numva ni nk’ikintu cy’inkota kinyuzemo ariko nongeye kugarura imbaraga z’impuhwe ndamubwira nti ndakubabariye, si ugupfa kuvuga ngo ndakubabariye rero hari benshi babivuga bitajyanye n’impuhwe. Iyo ubabariye ukagira impuhwe, ubwoba burashira. Kuki bakigira ubwoba? Umuntu wababariye akumva yarabohotse, ntaba agitinya umuhutu, aba yaragiye hejuru mu bindi bicu, amubonamo umwana w’Imana. Abo bose rero baba bagitinya iyamamazabutumwa, baba bagifite ubwoba burya baba batarababarira. Nashake abe musenyeri, barahari. Abo bakiri mu bya parmehutu, nibo batuma abantu badasaba imbabazi, kandi baba bahari mu nzego za Kiliziya. Iyo akiboshye nawe akibonamo amoko…"

Padiri Ubald w’imyaka 62 y’amavuko, amaze imyaka 33 yose ari umupadiri. Yagiye asobanura ko iyo asenga yerekwa uburwayi abantu batandukanye baba bafite, bamwe bagahita batangira ubuhamya aho ko bakize, abandi bakamushaka nyuma bakamwibwirira ko bakijijwe n’isengesho rye. Indwara z’ibyorezo nka Kanseri, SIDA, Diyabete n’izindi zidakira cyangwa zikira bigoranye, hari benshi bagiye batanga ubuhamya ko bazikiriye mu masengesho ya Padiri Ubald.


INKURU ZA :
Tanga Igitekerezo
Ibitekerezo 7
usenge Kuya 1-06-2017

Uyu mupadiri niwe uzi inzira nyakuri ijya mw’ijuru naho abandi baribeshya ntibazagerayo. Ikibabaje izi nyigisho ze ziremerera abantu cyane cyane abanyarwanda b’iki gihe. Niyo mpamvu ubwiyunge bwananiranye , ariko bumvise ibi uyu mupadiri avuga , abanyarwanda babana neza kandi n’abanyamadini bikaborohera kuyobora abantu inzira igana Imana

iganze Kuya 31-05-2017

Nyagasani akomereze imbaraga padiri Ubald intore ye, kandi abohore abakiboshye imitima bose, babe abigenga muri Kristu, bayoborwe na roho mutagatifu.
Ku isi tuhaca iakanya gato, tukahava tugataha iwacu, hashingiwe ku myitwarire yacu. Nta mpamvu yo kugirango ibihita bituvutse ingororano z’iteka bavandimwe. Twese abo kristu yameneye amaraso , mureke duhuguke, tumurangamire mbere ya byose. Ubu butumwa bwaje bukenewe.Padiri Imana ihoraho iguhe umugisha.

iganze Kuya 31-05-2017

Nyagasani akomereze imbaraga padiri Ubald intore ye, kandi abohore abakiboshye imitima bose, babe abigenga muri Kristu, bayoborwe na roho mutagatifu.
Ku isi tuhaca iakanya gato, tukahava tugataha iwacu, hashingiwe ku myitwarire yacu. Nta mpamvu yo kugirango ibihita bituvutse ingororano z’iteka bavandimwe. Twese abo kristu yameneye amaraso , mureke duhuguke, tumurangamire mbere ya byose. Ubu butumwa bwaje bukenewe.Padiri Imana ihoraho iguhe umugisha.

Damien Kuya 30-05-2017

Mbonye ko ibyo bari banditse kuri uyu mupadiri ko hari abantu yafungishije n’umugabo ntavuze izina ngo yicishije kwari ukumubeshyera,ni ikinyamkuru gikorera hanze cyari cyabyanditse
Gusa abana b’uwo mugabo nabo wumva batavuga Ubald neza
UMUREMYI Abiyereke

mbone Kuya 30-05-2017

Ingororano zanyu zirangiriraha. Reka kugenda wambika abo bana icyasha. Uwagenda aririmba ko uri umwana wumwicanyi ntibyakubabaza?

nana Ritha Kuya 29-05-2017

pastor Rugagi nuwo mu rihe torero?

binel Kuya 29-05-2017

ubundi icyo nicyo twita gukizwa kubabarira kukajyana n imirimo myiza yuko mwababariranye. mugafatanya no kwamamaza inkuru yibyo mwakijijwemo. Imana ikomeze ibahe imbaraga. Amena

IGURIRE
Reba Ibindi Byinshi
konka Monaco
IBARUWA ZA JORIJI
David’s temple
URUKUNDO
INKURU ZIKUNZWE
Ibitekerezo
Loading...
IZINDI NKURU WASOMA
Loading...