konka coffee
KONKA

AMAKURU

UKWEZI

AMAFOTO: Temberera mu Kinigi wumvirize abatera akabariro, urebe umugeni ahekwa mu ngobyi

AMAFOTO: Temberera mu Kinigi wumvirize abatera akabariro, urebe umugeni ahekwa mu ngobyi
6-04-2017 saa 11:57' | By Chief Editor | Yasomwe n'abantu 21014 | Ibitekerezo 2

Ibijyanye n’amateka n’umuco nyarwanda wo hambere, hari abakiri bato benshi babyumva mu nkuru bivugwa, bakumva amateka y’uko hambere bashyingiraga, uko imisango n’imigenzo yo ku ngoma ya cyami byakorwaga, ariko kubyiyumvisha bikagorana kuko biba ari ukubivuga bitagaragara.

Ubu ariko, utembereye mu Kinigi, hari ahantu wajya ukahava ubashije kumenya uko cyera bumvirizaga umugabo n’umugore bashyingiranywe mu gihe batera akabariro, ukibonera umugeni bamuheka mu ngobyi ya Kinyarwanda, ukibonanira n’umuvuzi gakondo, washaka kubona umwami uko yitwaraga ukahava ubyiboneye ndetse ugasobanukirwa byinshi byiza byarangaga umuco nyarwanda wo ha mbere.

Kuwa Gatatu tariki 5 Mata 2017, itsinda ry’abanyamakuru bari mu mahugurwa yateguwe n’Inama Nkuru y’Itangazamakuru i Musanze, batemberejwe mu Kinigi ahari ibikorwa byinshi bigaragaza isura y’Ubukerarugendo, ahanini aka gace kakaba kagendwa n’abashaka gusura Pariki y’Ibirunga. Mu bikorwa abanyamakuru basuye, harimo n’Ikigo cya Gorilla Guardians Village cyahoze ari Iby’Iwacu Cultural Village, kigizwe n’abahoze ari ba rushimusi bicaga inyamaswa muri pariki, bakaza kubireka ahubwo bakishyira hamwe ngo basigasire ibidukikije banateza imbere ubukerarugendo bushingiye ku muco.

Ukimara kugera kuri iki kigo, uhita ukubita amaso inzu ziteye ukwazo, zigaragaza neza isura y’imyubakire yo mu Rwanda rwo hambere, ndetse ukabona n’ishusho y’ibikorwa by’amateka n’umuco nyarwanda byo ha mbere, ukihera ijisho uko urugo rw’umwami rwari rumeze, ukabonana n’umuvuzi gakondo ndetse ukanasobanukirwa ibindi bijyanye n’imibereho y’abo mu Rwanda rwo ha mbere.

Nk’uko byasobanuwe na Twagirimana Innocent ushinzwe gutembereza abakerarugendo no kubasobanurira ibya Gorilla Guardians Village, umukerarugendo usuye iki kigo ashobora kwerekwa ubukwe bwa kinyarwanda, akabona uko bashyingira umugeni ndetse bakanamuheka mu ngobyi abireba, akagezwa ku mugabo we akinjira mu nzu, igihe kikagera bagatangira gutera akabariro abaturanyi bakajya inyuma y’inzu bakumviriza, kuburyo biha neza ishusho ubireba agasobanukirwa uko byabaga bimeze mu myaka yo hambere.

Twagirimana Innocent uyobora abakerarugendo

Niwitegereza ubwo bukwe, ukabona uko baheka umugeni, uko yinjira mu nzu igihe cyo gutera akabariro kikagera agatangira gutaka abandi bakajya inyuma y’inzu bakumviriza, ushobora kuzagirango koko ibi byabaye nk’uko Twagiramana Innocent abisobanura, nyamara ibi biba ari ibintu byateguwe, hakagenwa abashobora kubikina neza bakabigaragaza nk’impamo, kuburyo ubireba bimwinjiza neza mu mwuka wo gusobanukirwa uko byakorwaga mu Rwanda rwo ha mbere.

Aha hakorerwa ibikorwa by’ubugeni n’ubukorikori

Aka kazu niko kabitsemo ibijyanye n’amateka

Aha barakwereka iby’ingoma ya cyami mu Rwanda rwo hambere

Nugera muri iki kigo, uzabona inyubako zitandukanye zirimo n’iy’umwami, urebe ahubatswe ikigega bahunikagamo imyaka, ugere ahategurirwa inzoga ya kinyarwanda yengwa mu bitoki, utambagizwe ugere aho uzabona igikoni umenye uko hambere batekaga, ukomeze ugere ahakorerwa ibikorwa by’ubugeni n’ubukorikori, uze no kugera ku muvuzi gakondo muvugane agusobanurire nunabikenera akuvugutire umuti.

Aha baherekanira ibijyanye n’amateka y’ingabo z’umwami n’iby’intambara. Ninaho hari ibikoresho byifashishwa n’abakaraza basusurutsa ababagana

Ibijyanye n’inka, amata n’ibindi bifitanye isano uzabisanga aha

Iki nicyo kigega cyahunikwagamo imyaka

Ibiryo bya Kinyarwanda, aha uzahava umenye uko byategurwaga

Niba utazi uko benga urwagwa, utazi akamaro k’umuvure, ubutanga n’uruho, byose uzahava ubyiboneye

Ibi byose biba ari ibintu byateguwe bakoresha bereka umukerarugendo ibijyanye n’umuco gakondo w’u Rwanda, icyakoze umuvuzi gakondo we aranavura bya nyabyo, abaturiye aka gace nabo barabyemeza. Ni umusaza ukuze, wivugira ko avura indwara zitandukanye akoresheje imiti ya Kinyarwanda, akanafasha abagabo n’abagore bafite ibibazo byo gutera akabariro.

REBA VIDEO HANO UKO UMUVUZI GAKONDO ABISOBANURA:

Aha iby’ubuvuzi gakondo byo si ukubikina, uyu musaza avuga ko yagiye arokora ubuzima bwa benshi akoresheje imiti gakondo

Izi ni inzu zitandukanye zigize iki kigo, zirimo aho ushobora kurara, ubwiherero, aho wafatira amafunguro, ahagenewe gukoreshwa nk’urugo rw’umwami, ahagenewe gukoreshwa n’urugo barongoreramo abandi bakumviriza n’ibindi

Itsinda ry’abanyamakuru basuye iki kigo, ryanafashe akanya ryishyira mu mwanya w’abavugwa muri iki kigo barimo nk’umwami n’umugabekazi we, maze bakina bimwe mu bigaragaza ishusho y’uko byabaga bimeze hambere, ari nako basobanurirwa n’umukozi ubishinzwe. Iki kigo ni ishuri ryiza ry’amateka n’umuco ariko kikaba ari n’ahantu wo kwidagadurira ukaruhuka mu mutwe. Ubuyobozi bwacyo buvuga ko buha ikaze n’umuntu wifuza kuhakorera ubukwe bwa Kinyarwanda, umugeni agahekwa mu ngobyi, bakamuririmbira ibihozo dore ko banafite itorero ndangamuco...

Aha abanyamakuru bari niho hateguwe nk’urugo rw’umwami. Barimo gukoresha bimwe mu bikoresho byakoreshwaga n’umwami cyangwa abagaragu be

Aha bamwe mu banyamakuru bambaye ibishushanya uko umwami n’umugabekazi bambaraga

Twagirimana Innocent arimo gusobanura uko rubanda bageraga ibwami, uko rubanda bahitwaraga n’ibyihariye byahaberaga

Bakoze ibikorwa bitandukanye, bifashishwa n’umukozi w’iki kigo kugaragaza uko cyera byari bimeze

Aha umunyamakuru Rutayisire Aisha wa Voice of Africa yari yabaye umugabekazi, ajya ku rutara (uburiri bw’umwami), afata igisabo aracunda...


INKURU ZA :
Tanga Igitekerezo
Ibitekerezo 2
yee Kuya 9-04-2017

ahaaa!wowe wiyise tesy uransekeje pe!Reba nawe kwishakira umugore bakamukurongorana?

tesy Kuya 6-04-2017

Ariko rwose uwanyereka umuntu bamukungutura ngo hari abantu bazi kwigisha uko banyazaga ngo hari umusaza uhari ufite ubunararinyaje ngo anyaza umuntu noneho ngo abari kumviriza bakumva bamusaba

IGURIRE
Reba Ibindi Byinshi
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...