konka coffee
KONKA

AMAKURU

UKWEZI

Menya byinshi kuri Rosalie Gicanda, umwamikazi wa nyuma w’u Rwanda wishwe muri Jenoside

Menya byinshi kuri Rosalie Gicanda, umwamikazi wa nyuma w’u Rwanda wishwe muri Jenoside
6-04-2017 saa 15:05' | By Chief Editor | Yasomwe n'abantu 11874 | Ibitekerezo 7

Rosalie Gicanda wishwe muri Jenoside yakorewe abatutsi akicirwa mu cyahoze ari Perefegitura ya Butare, ni we mwamikazi wa nyuma u Rwanda rwagize mu mateka yarwo, akaba yari umugore w’umwami Mutara III Rudahigwa. Nta wundi mwamikazi wabayeho nyuma ye, kuko umwami Kigeli V Ndahindurwa wabaye umwami wa nyuma w’u Rwanda, atigeze ashaka ndetse yatanze ari ingaragu ku myaka 80 y’amavuko.

Gicanda Rosalie yavukiye i Rwamagana mu mwaka w’1928. Yakuze ari umukobwa muremure benshi bemeza ko yari mwiza kandi ko yarangwaga n’ikinyabupfura n’isoni nyinshi, ibi byagaragaye cyane mu muhango wo gutoranya umwamikazi, ni ukuvuga uwagombaga kuba umugore w’umwami, hari ku ngoma ya Mutara III Rudahigwa.

Ubwo habaga umuhango wo gutoranya umwamikazi, icyo gihe abakobwa bose bari batoranyijwe bagombaga guca imbere y’umwami Rudahigwa bambaye uko bavutse, ariko bigeze kuri Gicanda araturika ararira bitewe n’uko atashoboraga kubyihanganira, ibi bikaba ari byo byatumye umwami Rudahigwa amuhitamo bitewe n’imico ye myiza.

JPEG - 238.5 kb

Tariki 13 Mutarama 1942, nibwo Rosalie Gicanda yashyingiranwe n’umwami Mutara III Rudahigwa waje kubatizwa agahabwa izina rya Charles Léon Pierre. Bakoze ubukwe bashyingiranwa imbere y’Imana, cyane ko icyo gihe umwami Mutara III Rudahigwa yari yaremeye kureka imigenzo y’imyemerere gakondo akabatizwa agahabwa izina rya Charles Léon Pierre, ndetse u Rwanda akarutura Kristu umwami.

Gicanda Rosalie ni we mwamikazi wa nyuma w’u Rwanda. Yabaye umugore wa kabiri wa Rudahigwa nyuma y’uko uwa mbere ari we Nyiramakomali yari yirukanywe. Icyo gihe bamuzizaga ko atabyaraga, gusa Nyiramakomali yaje gushyingirwa Nyirimbirima mwene Nshozamihigo babyara abana benshi bitangira kuvugwa ko Rudahigwa ari we utarabyaraga.

Tariki 25 Nyakanga 1959, umwami Mutara III Rudahigwa wari warabatijwe Charles Léon Pierre, yaratanze, apfa urupfu rwatunguranye cyane. Mu mwaka w’1961 ubwo hari inkubiri yo gushaka kwimakaza ubutegetsi bwa Repubulika, uwari Perezida w’u Rwanda icyo gihe; Geregori Kayibanda, yirukanye mu rukari umwamikazi Rosalie Gicanda, mu rwego rwo kuzimanganya burundu ingoma ya cyami n’ibimenyetso byayo.

Rosalie Gicanda yakomeje kuba mu mujyi wa Butare aho yiciwe muri Jenoside yakorewe abatutsi afite imyaka 66 y’amavuko, hari tariki 20 Mata 1994. Rosalie Gicanda yishwe arashwe ku itegeko rya Lt Pierre Bizimana ndetse na Dr Kageruka wari umuganga mu bitaro bya Kaminuza ya Butare, bose bahawe amabwiriza na Captain Ildephonse Nzeyimana. Gicanda bamwicanye n’abandi bagore batandatu bari inshuti ze hamwe n’abandi bo mu muryango, bakaba barabajyanye imbere y’ingoro y’umurage w’amateka y’u Rwanda i Butare barabarasa, umwana w’umukobwa waje kurokoka niwe wasigaye abara inkuru y’urwo uyu mwamikazi n’abo bari kumwe bapfuye.

Nyuma ya Jenoside yakorewe abatutsi mu Rwanda, Lt Bizimana Pierre n’umusirikare muto witwa Aloys Mazimpaka, bahamijwe n’urukiko rwa gisirikare icyaha cyo kwica umwamikazi Rosalie Gicanda, Lt Bizimana ahita akatirwa igihano cyo gupfa cyari cyemewe mu Rwanda icyo gihe, naho Mazimpaka akatirwa igifungo cya burundu.

Tariki 6 Ukwakira 2009, Cap Ildephonse Nizeyimana wahoze akuriye ibiro by’ubutasi akaba yari n’umwe mu bahigwaga cyane ngo baryozwe ibyaha bya Jenoside, yafatiwe i Kampala mu gihugu cya Uganda maze ashyikirizwa urukiko mpanabyaha rwari rwarashyiriweho u Rwanda rwakoreraga i Arusha muri Tanzania, tariki 19 Kamena 2012 ahamwa n’icyaha cyo gutanga itegeko ryo kwica umwamikazi Rosalie Gicanda kimwe n’ubundi bwicanyi bwakozwe muri Jenoside, ahita akatirwa igifungo cya burundu.

Mu rwunge rw’amashuri rwa Mater Dei i Nyanza, tariki 20 Mata 2012 ubwo habaga umuhango wo kwibuka ku nshuro ya 18 umwamikazi Rosalie Gicanda, Musenyeri Anaclet yashimangiye uburyo Rosalie Gicanda yaranzwe n’ubupfura bwo kwicisha bugufi, kwiyoroshya no kumva buri wese kuko yiyamburaga icyubahiro cy’ubwamikazi agasabana na rubanda rugufi. Yasobanuye uburyo yari umuntu wakundaga gusenga uko bwije n’uko bukeye, ibyo bikaba bizwi cyane n’ababikira bo mu muryango w’Abenebikira bahoranaga nawe.

Ubu umubiri w’umwamikazi Rosalie Gicanda uruhukiye i Mwima ya Nyanza ahatabarijwe umwami Mutara III Rudahigwa wari umugabo we, ndetse n’umwami Kigeli V Ndahindurwa uherutse kuhatabarizwa mu mpera z’umwaka wa 2016.


Tanga Igitekerezo
Ibitekerezo 7
kabibi Kuya 20-04-2017

Nonese umwamikazi Gicandi yabyaye abana bangahe?

Matimba Kuya 9-04-2017

Nonese ahokugirango yicwe uwabiteye ninde muzamubaze neza icyo
Yiyemeje kumara royal family naba gore babo akaza kubeshya abanyarwanda

manu Kuya 7-04-2017

mbega ubugome bukabije abicaga Ababa babyaye nabo baraye mumagara bari kureka kwica umwamikazi?

kakuze Kuya 7-04-2017

ariko mama abicaga Ababa babo bari kureka kwica umwamikazi ?izo nkoramaraso zabahutu zizapfa nabi

Kayitankore Kuya 6-04-2017

Nta kintu kijya kimbabaza nk’ukuntu tubona inzu gicanda yabagamo banamukuramo bajya kumwica i huye yafashwe nk’igisambu byongeye inatuye imbere y’ibiro by’akarere ka huye hatari na Kure ya musée.ariko Butare irabura iki n’amateka yayo??????

lg Kuya 6-04-2017

byose ntibivugwa, uruhurirane ubufatanya,,migambi, yabarutuku babanya, politiki na barutuku, baba padri, ise numwe, nyina numwe. ibitekerezo bimwe ubugome bumwe iyo ukurikiye, urupfu, rwu mwami, ugushyirwa kwa, kayibanda, ku butegetsi, naba padri cy abasenyeri batukura, iyo wumva misa yo gusezera, umwami uwayisomye, we avugako bimushimishize ko apfuye iyo wumva kayibanda yirukana gicanda, murukari hatari, mwisambu yase, rwaruhurirane nukuri urabibona, gusa isi nii isi abo bose nabo barapfuye ndetse bamwe batanze, gicanda gupfa ndetse bapfa, nabi nimbabazi, burya, bage bazisaba, banemera, nuruhare rwabo batavuga ko bazisabira, abakristu babo kuko bifite aho byavuye nicyo bashakaga kugeraho, nubwo abantu bake bashira, basigarana benshi !!!

Niyonshuti Kuya 6-04-2017

Ariko Mana abamwishe bazabibarizwe imbere y’inteko y’ijuru kdi Imana imwakire kimwe nabazize genocide yakorewe abatutsi.

IGURIRE
Reba Ibindi Byinshi
FPR Kagame 2
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
IBIRORI
Ibitekerezo
IZINDI NKURU WASOMA