konka coffee
KONKA

AMAKURU

UKWEZI

Dore inkuru ikwiye kubera isomo abantu bose ariko cyane cyane abagore

Dore inkuru ikwiye kubera isomo abantu bose ariko cyane cyane abagore
27-08-2016 saa 06:13' | By Chief Editor | Yasomwe n'abantu 32003 | Ibitekerezo 12

Hari umugore wari ufite umugabo wakundaga gutaha yasinze akamukubita cyane, iteka uko atashye agataha yasinze maze intonganya mu rugo zikaba zose. Ni uko umugore bigera aho biramurenga, kwihangana biramunanira yigira inama yo kujya kuraguza ngo arebe ko byakemuka.

Ubwo rero hakaba hari umusaza w’umupfumu bamurangiraga ko ngo ari umuhanga mu gufasha abagore n’abagabo mu mibanire yabo. Ni uko aragenda ajya kuri uwo musaza, gusa mu by’ukuri uwo akaba yari umusaza uzi ubwenge cyane akanaba intyoza mu mibanire y’abantu ari nabyo byatumaga rubanda bamwita umupfumu muri byo. Ubwo umugore ahageze atekerereza uwo musaza ikibazo afite, amubwira ko yifuza umuti wamufasha guhindura umugabo we akagabanya amahane n’intonganya mu rugo ndetse akajya abasha no kumutega amatwi.

Umusaza amutega amatwi yumva neza ikibazo cye arangije ati: “Nta kibazo rwose umuti ndawuguha ariko kandi hari icyo ngusaba nanjye. Uragenda unzanire ubwoya bw’ingwe, nuramuka ububonye intsinzi y’icyo kibazo cyawe izaba ibonetse, kandi nuzana ubw’ingwe yapfuye umuti ntuzakora wowe ugomba gukora ibishoboka byose ukazana ubwoya bw’ingwe ikiri nzima”. Ni uko umugore yumva birakomeye, atekereza amahane n’ubukana bw’ingwe yumva ntabwo byoroshye kubona ubwoya bwayo ariko kuko nta kundi yari kubigenza yiyemeza gukora iyo bwabaga.

Bukeye umugore atekereza uburyo yatangira akajya yimenyereza ingwe buhoro buhoro, ajya mu ishyamba yari azi ko ryabagamo ingwe maze yitwaza urukwavu, ingwe ije imusatira ayinagira urukwavu ariruka. Ni uko arataha bukeye asubirayo agenda ajyanye ihene, nabwo agenda ayegera abonye ije imusatira ayinagira ya hene ariruka, abikora kenshi uko agiye kuyireba akitwaza agatungo ingwe yatangira kumusatira akayinagira agatungo agakizwa n’amaguru nayo igasigara irya ka gatungo.

Ni uko hashize iminsi ya ngwe iba imaze kumenyera ko uwo mugore aba ayizaniye ibyo kurya, iramumenyera buri gihe yaza ntishake kumusagarira ahubwo igategereza ko ayihereza agatungo ayizaniye. Umugore yabikoze kenshi ari nako agenda yishimira ko abona ashobora kuzabasha kubona ubwoya bw’ingwe bamutumye, maze uko agenda abona ko yagabanyije amarere nawe akaba ariko agenda ayegera ariko anitwaza agatungo ko kuyihereza.

Ubwo igihe cyarageze wa mugore ingwe iramumenyera cyane, bahinduka nk’inshuti umugore akajya atangira no kuyegera akayagaza nayo igatuza maze umugore aza kuyiguyaguya ayikuraho ubwoya atwara mu ntoki aragenda abwira wa musaza wabumutumye ko umuti yawubonye. Ni uko umusaza aratangara cyane, arangije aramubaza ati: “Nonese ubu bwoya wabukuye ku ngwe nzima? Wabigenje ute rero ngo ubugereho?”

Umugore amusobanurira ukuntu yatangiye buhoro buhoro ayimenyereza akagenda ayishukisha udutungo maze aza kugera aho baba inshuti aza kuyegera abasha kubona ubwoba. Ni uko umusaza ati: “Ngaho rero koko umuti urawubonye kuko uri intwari ahubwo ni uko utajya ubimenya, genda iwawe utangire wiyegereza umugabo wawe nk’uko wabigenje wiyegereza ingwe kandi we bizakorohera kuko n’iyo yaba umunyamahane ate ntiyageza ah’inyamaswa y’inkazi nk’ingwe. Uko uzajya ugenda umwiyegereza buhoro buhoro niko azagenda agukunda kuburyo uzageza igihe nawe ukabona ko koko abasha kukumva no kugutega amatwi kandi mukagira urukundo ruhambaye n’ubwumvikane hagati yanyu”. Ni uko umugore arumirwa, atangarira uwo musaza maze aragenda akurikiza ibyo yamubwiye maze akanyamuneza n’urukundo bitaha urugo amahoro arahinda urugo ruba intangarugero mu mibanire myiza.

ISOMO: Aha ndibanda cyane ku bagore bamwe na bamwe bumva ko abagabo babo batabumva, ko bataha abari mu rugo bose bagakangarana, burya umugore ni umuntu ushoboye cyane ni uko bamwe batajya babimenya. Icyo umugore yerekejeho umutima byanze bikunze nticyamunanira, ahubwo ikibazo ni uko bamwe bajya bitinya cyangwa bagashyira imbaraga mu matiku cyangwa gushaka inzaratsi.

Biroroshye cyane kugusha neza umugabo wawe ukoresheje utuntu duto duto, ukoresheje kumubwira n’imvugo ituje ndetse n’amagambo aryohereye, burya abagabo bagira imitima yoroshye kwigarurira kandi umugabo wabashije kumugusha neza ntacyo atagukorera ndetse ntacyo yakwima. Muri iyi minsi usanga abashakanye bamwe na bamwe babanye nabi kugeza n’aho bajya bicana nyamara nyine ni ngombwa ko abagore bamenya imiterere y’abagabo muri rusange.

Nk’uko nahereye kuri ruriya rugero, umugabo wamurakaje yagira ubukana busumbya ubw’ingwe kandi burya abagabo baba bifuza kugaragaza ko ari abanyantege ndetse ko umugore adashobora kubarusha ijambo, iyo umugore acishije make rero nabo baratuza kandi iyo azamutse nabo barazamuka. Ibuka kumwe witwaraga akikurambagiza, wibuke icyubahiro wamuhaga ndetse uzirikane uburyo wakoraga ibishoboka byose ngo akubone nk’umukobwa w’umutima maze n’ubundi ubikore ndetse unarusheho kuko nyine niba ari bimwe mu byo yagukundiye ntukwiye kumutenguha ngo wumve ko mwasezeranye ivangamutungo kandi uzwi mu mategeko maze bitume wigira indakoreka.

Uretse n’ibyo ariko, no mu buzima busanzwe ukwiye kumenya gutwara neza umuntu, n’uwo ubonaho ubukana ukamugusha neza bityo nawe akemera kugendana nawe neza, aho kumva ko gukanga no gukankamira umuntu byaba ari byo gisubizo.


INKURU ZA :
Tanga Igitekerezo
Ibitekerezo 12
edrice Kuya 12-12-2016

ni ukuri koko.yemwe bagore mukunde abagabo banyu

Nepos Kuya 22-11-2016

Ibyo ni ukuri.ngo "ukomanyije amasahani abiri y’amadongo yombi yameneka ariko uyakomanyije imwe ari prastique ntacyo yaba";kugirango abantu babiri mu muryango babane ni uko umwe yitwara nk’isahani ya prastique ku idongo,acisha make kandi akubaha ariko umwe navuga n’undi akavuga,urugo ruzashya.thanks

venerande Kuya 21-11-2016

IYINKURU NI IYUBWENGE KOKO UMUGORE WESE AKORESHEJE UYUMUTI WAKORA, UYU MUTI URAKOMEYE CYANE URUSHA IGIKAKARUBAMBA NA TUNGURUSUMU KUVURA KUKO WO UVURA IGIKOMERE CYO KUMUTUMA UBUNDI USHAKA IBYIZA ARABYIHESHA UBUSE WAHA UMUNTU UMUBIRIZI AKAGUHA BISWI?NIBA UKUNDA GUTETESHWA BANZA UTETESHE ICYO UTANZE NICYO UHABWA NUBIBA AMAHORO UZASARURA ANDI NUBIBA URUKUNDO UZASARURA URUKUNDO NDAKUBWIZA UKURI TWEBWE NITWE BISUBIZO BYIBIBAZO BYACU CYANE CYANE MUNGO,NUBIKORA RIMWE UKABONA BIRANZE JYUKOMEZA UGERAGEZE BIRATINDA BIGACAMO,UBUNDI IYO USHAKA AMAHORO GUTUZA URABANZA UKAYIHESHA HANYUMA UKAYAHA UWOMURI KUMWE NAWE ARAYAGUHA IKINDI NIBA UMUNTU AKUBWIYE ICYO YANGA UKAKIRENGAHO TAYARI WAMAZE GUTAKAZA AMAHORO YAWE UBWOSE HARUMUNTU UYAKWIMYE?AHUBWO WAYABUJIJE MUGENZI WAWE HARI INGESO ABAGABO BAGIRA BAZITEWE NABAGORE BABO KIMWE NABAGABO BAZITERA ABAGORE,EREGA INEZA IHOSHA UBURAKARI KANDI NTABWO NDABONA UMUNTU WANGA KUBWIRWA NEZA IKINDI IJAMBO RYIZA NTABWO RIJYA RIVA KUMUTIMA WUMUNTU NAHO WABA UTAKIRIHO IGIHE KIRAGERA RIKAGUSIGARIRA MUMWANYA IGIHE CYOSE MUTAKIRI KUMWE(ARIKO HARUBWO UMUNTU AGERAGEZA BIKANGA WIBUKEKO ABANYARWANDA BACIYE UMUGANI NGO INZOKA YAKWANZE UYIHA AMATA IKARUKA AMARASO).

bwiza racheal Kuya 6-11-2016

ni byiza kwicisha bugufi. God bless’s your media .

mahoro Kuya 30-10-2016

mwibagiwe akantu ..

....
si jye wahera hahera umugani!!!

asiimwe vestine Kuya 26-10-2016

Murakoze cyane inama nk’izo zirakenewe pe

MP SAVE HOUSE Kuya 24-10-2016

NDEMEYE PE MURI ABAHANGA UYU MUNYAMAKURU WAKOZE IYI NKURU MUMWONGEZE UMUSHAHARA NIBA MUSHAKA ABAKIRIYA NAHO UBUNDI ARABACIKA IBINDI BINYAMAKURU BIBARUSHA FR BIMUJYANE KUKO IYI NKURU IRARENZE,NB:MUZADUSHAKIRE NUMUGORE WANANIRANYE UKO BANUGENZA UBANZA WE BAGUSABA IRYINYO RYINGONA

lily Kuya 10-10-2016

ndabashimira kumpuguro muduha

Redempta Kuya 8-10-2016

Murakoze cyane Ku tugira inama.

BIZIMANA Kuya 6-10-2016

Byose birashoboka , Every thing is possible under the God’s grace

SAFARI Kuya 4-09-2016

MURAKOZE ARIKO MUTIBAGIWE ABAGORE BIGIZE INGARE ABAGABO BAZABAHOSHE GUTE?

uk Kuya 1-09-2016

It’s true, abanyamahane babiri ntibashobokana. Umwe agomba gucisha make cyane cyane umugore kuko umugabo iteka yiyumvamo ubutware, bamwe bakibwira ko gutegeka ari ukugira amahane kugira ngo umugore n’abana bagutinye.

IGURIRE
IBARUWA ZA JORIJI
konka Monaco
URUKUNDO
nkusi
INKURU ZIKUNZWE
Ibitekerezo
Loading...
IZINDI NKURU WASOMA
Loading...