Abakundana bagufi kurusha abandi ku isi bambikanye impeta ihamya urukundo rwabo - Amafoto

Chief Editor | 10-08-2016
Abakundana bagufi kurusha abandi ku isi bambikanye impeta ihamya urukundo rwabo - Amafoto

Paulo Gabriel da Silva Barros n’umukunzi we Katyucia Hoshino, nibo bakundana (Couple) bagufi kurusha abandi bose ku isi. Paulo Gabriel da Silva Barros afite uburebure bwa santimetero 88 mu gihe umukunzi we Katyucia Hoshino we afite uburebure bwa santimetero 89, bakaba bambikanye impeta ihamya urukundo rwabo (engagement) nyuma y’imyaka 8 bari mu buryohe bw’urukundo.

Uyu mugabo n’umugore we ni abo mu gihugu cya Brazil, bakaba barahuriye ku mbuga nkoranyambaga mu myaka 10 ishize, batangira kujya baganira kugeza ubwo baje gukundana bikagera no ku gitekerezo cyo kwemeranywa gushyingiranwa n’ubwo bibaniraga batarakora ubukwe. Paulo w’imyaka 30 y’amavuko, avuga ko akibona Hoshino yamubonyemo umukobwa w’igitangaza agahita amukunda.

Bamaze kwambikana impeta ishimangira urukundo bakundana

Nyamara ibi siko byari bimeze kuri Katyucia Hoshino w’imyaka 26 y’amavuko, kuko akimubona yabanje kumukumira akamukura mu bemerewe kumuvugisha ku mbuga nkoranyambaga (block). Yagize ati: "Ubwa mbere ntangira kuvugana na Paulo, numvaga antesha umutwe."

Nyuma yo kwambikana impeta bateganya no gusezerana bagakora ubukwe

Paulo ukora akazi k’ubunyamabanga mu by’amategeko, avuga ko Hoshino yamukekagaho kuba umusore w’inteshamutwe washakaga kumukwena, nyamara yari yaramwikundiye by’ukuri. Nyuma y’umwaka n’igice, Hoshino yaje gukura Paulo mu batemerewe kuvugana nawe, bituma bongera kugirana ibiganiro ndetse umusore aza kugenda ibirometero 300 agiye iwabo w’umukobwa mu mujyi witwa Londrina.

Paulo avuga ko akimubona, yasanze ari umukobwa w’uburanga n’imico myiza. Kuva ubwo batangiye gukundana, ndetse nyuma y’imyaka ine batangira kubana. Ku mukobwa, bwari ubwa mbere yinjiye mu rukundo. Hoshino ati: "Bwari ubwa mbere nkundanye n’umusore, Paulo niwe mukunzi wa mbere nagize, niwe wambereye byose."

Ubu aba bombi bamaze kwemeranywa kuzibanira vuba nk’umugore n’umugabo, kuko umugabo yamaze kwambika uzamubera umugore we impeta ibishimangira. N’ubusanzwe ariko bari babanye neza kandi bavuga ko gushyira hamwe mu rugo rwabo ari byo bikomeza umubano wabo.

Paulo afite imodoka yahinduwe mu buryo bumwemerera kuyitwara n’ubwo ari mugufi, mu gihe Hoshino nawe afite salo y’ubwiza nayo yahinduwe kugirango bijyanye n’ubugufi bwe.

Imodoka ye imbere yarahinduye kuburyo ubugufi bwe bumwemerera kuyitwara.

Hoshino nawe abasha gutunganya imisatsi y’abagore n’ubwo ari mugufi.

Paulo Gabriel da Silva, ubu afite gahunda yo kwiyamamariza kuyobora umujyi batuyemo wa Itapeva kandi yizeye ko azatsinda akawubera Meya.

Umugore yivugira ko yitomboreye umugabo bashyira hamwe, umwumva kandi akamwihanganira. Agira ati: "Ikintu cya mbere mushimira, ni uburyo yicisha bugufi. Tujya twicara tukaganira ku by’urukundo rwacu, haba hari ikibazo tukagishakira umuti. Ndabizi ngira kamere mbi, ndakara nabi, kubana nanjye ntabwo byoroshye ariko Paulo aranyumva kandi akanyihanganira, nicyo kintu kidasanzwe mukundira. Dukunda cyane gusangira no kuryamana, ni ibintu twishimanamo cyane."

Paulo na Hoshino, bavuga ko ubugufi bwabo bubabangamira mu bijyanye no gukoresha ibyuma babikuzaho amafaranga (ATM), kujya mu bwogero rusange no kujya ku meza y’amaresitora, kuko basanga akenshi bibasumba. Gufungura amadirishya n’inzugi nabyo bibabera imbogamizi, ibi bikiyongera ku kuba hari abantu babaseka bakabaha urw’amenyo n’iyo bagendana mu muhanda, ariko ibyo bakaba barabyakiriye bakabimenyera.

Bavuga kandi ko bateganya kubyarana, n’ubwo bafite ubwoba ko ingano y’umugore ishobora kuzaba ikibazo mu gutwita kwe. Bateganya kandi gukora ubukwe bakabana byemewe n’amategeko, kandi mu gihe baramuka batanabyaranye, bavuga ko bitazababuza kwishimana.

KANDA HANO UREBE VIDEOS UTASANGA AHANDI