Bagira umusatsi muremure cyane kandi bogosha rimwe mu buzima bwabo - Amafoto

Rukundo Irené | 7-08-2016
Bagira umusatsi muremure cyane kandi bogosha rimwe mu buzima bwabo - Amafoto

Izina Rapunzel ni izina ryagiye rikoreshwa mu nkuru mpimbano zo mu bitabo, zagaragazaga Rapunzel nk’umukobwa mwiza ufite umusatsi muremure ugera ku birenge. Ibi byo si inkuru mpimbano nk’iya Rapunzel, ahubwo yerekana uburyo abakobwa bo mu rusisiro rwa Huangulo mu majyepfo y’uburengerazuba bw’u Bushinwa bagira umusatsi ugera ku birenge dore ko bogosha inshuro imwe mu buzima bwabo.

Abashinwakazi bo mu bwoko bwitwa Yao mu ntara ya Guangxi bogosha umusatsi wabo inshuro imwe mu buzima mbere y’uko bashyingirwa. Muri aka gace habonekamo abagore bagera kuri 60 bafite umusatsi ugera ku birenge, usanga umusatsi wabo upima guhera ku burebure bwa metero imwe kuzamura. Ufite umusatsi muremure muri ako gace ufite metero 2 z’uburebure.

Pan Jifeng w’imyaka 51 ni umwe mu bakomeye kuri uyu muco w’aba baturage, nawe akaba yarogoshe umusatsi we inshuro imwe kuva mu bwana bwe. Pan, avuga ko iri banga ryabo ryabayeho igihe kirekire bagenda batoza buri bana bavutse ko bagomba kwita ku musatsi wabo ndetse bakita no ku bwiza bwawo. Yongeyeho ko mu koza umusatsi wabo bafata amazi bogesheje umuceri bakaba ari yo bakoresha boza umusatsi. Si umuceri ubonetse wose bakoresha amazi yawo kuko uwo muceri bifashisha ni umuceri ukunze kwera mu bice bimwe na bimwe bya Asia.

Pan aganira n’itangazamakuru yagize ati: ”Twogosha umusatsi wacu iyo tugeze ku myaka 18 kuko ari byo bigaragaza ko umukobwa akuze ndetse ko yegereje igihe cyo kuba yashyingirwa.”

Iyo bageze muri iki kigero cyo kogosha, ntabwo umusatsi bakuyeho bawujugunya ahubwo barawubika kuko nyuma y’ubukwe uwo musatsi wabo bawambara mu buryo bwo gutandukanya uwashyingiwe ndetse n’utarashyingirwa. Abenshi muri aba bagore bifashishwa mu gihe hari imyiyereko mu gace k’iwabo nk’igihe basuwe na ba mukerarugendo.

Mu mwaka wa 2004, uwitwa Xie Quiping wo mu Bushinwa ni we wabaye uwa mbere ku isi mu bafite umusatsi muremure kurusha abandi, umusatsi we wapimaga metero eshanu z’uburebure ndetse akaba yarashyizwe muri Guiness World Record.

Source: Daily Mail

KANDA HANO UREBE VIDEOS UTASANGA AHANDI