Kigali: Ubukwe bwa Bishop w’imyaka 26 n’umukobwa w’imyaka 54 bwahuruje imbaga - Amafoto

Chief Editor | 26-06-2016
Kigali: Ubukwe bwa Bishop w’imyaka 26 n’umukobwa w’imyaka 54 bwahuruje imbaga - Amafoto

Ubukwe bw’umusore w’imyaka 26 y’amavuko usanzwe ari na Bishop mu itorero ry’Umusozi w’Ibyiringiro, wasezeranye n’umukobwa w’imyaka 54, bwahuruje abantu benshi mu mujyi wa Kigali, umusore ahishura ko yashatse gukora ibyananiye abandi basore.

Frederic Niyomutakirwa w’imyaka 26 y’amavuko n’umukunzi we Mukundente Felicité w’imyaka 54 y’amavuko, basezeraniye mu murenge wa Kagarama mu karere ka Kicukiro kuwa Kane tariki 23 Kamena 2016, indi mihango y’ubukwe bwabo iba kuri uyu wa Gatandatu.

Mu masaha ya mugitondo cyo kuri uyu wa Gatandatu, abantu benshi biganjemo abatari basanzwe bazi abageni, bahurujwe n’ubukwe babonaga nk’igitangaza, aho umusore yashakanye n’umukobwa umurusha imyaka 28.

Imihango yo gusaba no gukwa yabereye Kimironko mu mujyi wa Kigali, aha abantu bakaba bari bishwe n’ibitwenge cyane ko iyi mihango ivugirwamo imihango irimo no gutebya bavuga ko umukobwa atarakura.

Nyuma yo gusaba no gukwa, bakomereje mu rusengero Umusozi w’Ibyiringiro rwa Kimisagara mu mujyi wa Kigali, aha ho hakaba harabereye ibintu bidasanzwe kuko n’abavugabutumwa babasezeranyije bibanze cyane ku magambo acyurira abantu bari batangajwe n’ubu bukwe. Nyuma bagiye kwiyakirira Kimironko n’ubundi mu mujyi wa Kigali.

Mu kiganiro yagiranye n’ikinyamakuru Ukwezi.com, Niyomutakirwa Frederic yashimangiye ko akunda bidasanzwe uyu mukunzi we, kandi uretse abantu bavuga ibyabo akaba yizeye ko bazabana bakanabyarana kuko Imana ari yo ibyara hatabyara imyaka.

Avuga ko yamukunze amureba, atamushutse cyangwa ngo amufate ku ngufu kandi bombi bakaba bari bujuje ibisabwa ngo basezerane bityo akaba atewe ishema no kumugira nk’umugore we yizeye ko azamubyarira abana, dore ko ibyo kuba yaba yaracuze atazabyara byo avuga ko Imana ari yo itanga urubyaro, n’abakobwa bato bakaba bashobora kuba ingumba.

Frederic kandi avuga ko uyu mugore we bari bamaze imyaka 5 bakundana, bivuga ko yamukunze afite imyaka 21 undi afite imyaka 49, akaba yaramukunze amureba kandi azi imyaka ye, ariko akongeraho ko yashatse gukora ibyananiye abandi basore benshi.

KANDA HANO UREBE VIDEOS UTASANGA AHANDI