Ku myaka 36, Robert afite abagore 17 n’abana 31 kandi aracyashaka abandi

Chief Editor | 21-05-2016
Ku myaka 36, Robert afite abagore 17 n’abana 31 kandi aracyashaka abandi

Robert Kathata w’imyaka 36 y’amavuko ni umugabo ukomoka mu gihugu cya Kenya, umaze gushaka abagore 17 akaba amaze kubyarana nabo abana 31 ariko aracyafite gahunda yo gushaka abandi bagore cyane ko avuga ko ari umurage w’umuryango.

Robert Kathata watangiye gushaka abagore afite imyaka 18 gusa y’amavuko, yabwiye Citizen TV ko atarageza ku bagore se yari afite, ari nayo mpamvu agikomeje gahunda ye yo gushaka abandi bagore.

Robert ati: "Nashatse umugore wa mbere mfite imyaka 18 y’amavuko. Umuco wacu utwemerera gushaka abagore benshi, kandi ni n’umurage w’umuryango nakomoye kuri data. Nterwa ishema no gutunga abagore benshi, nkanamenya ko abana banjye bose babashije kujya ku ishuri. Naba umugabo wo guhamya ko umugabo ashobora kubana mu mahoro n’abagore benshi."

Uyu mugabo avuga ko buri mugore afite urugo rwe yihariye, akaba amarana ibyumweru bibiri na buri umwe ubundi akimukira ku wundi kuzageza abahetuye, bivuga ko amara amezi hafi umunani atarahetura abo bagore be bose. Avuga ariko ko buri wese amuvugisha buri munsi kandi akagerageza kubafata kimwe.

Yagize ati: "Mvugana nabo buri munsi, nkabigisha uko bakwiye kubana mu mahoro. Nifuza kubafata kimwe kugirango hatagira n’umwe undakarira. Buri mugore namwubakiye inzu ye kugirango abeho atuje. Ubu maze kubyarana nabo abana 31 ariko ndacyashaka n’abandi, ngomba gutera ikirenge mu cya data ngashaka n’abandi bagore."

Abagore b’uyu mugabo, bose bamutangira ubuhamya ko abitaho kandi akaba abafata neza uko abishoboye kose. Nta n’umwe umwinuba cyangwa ngo agaragaze ko abangamiwe no kugira bakeba be benshi.

Muri Mata 2014, igihugu cya Kenya cyatoye itegeko ryemerera umugabo gushaka abagore benshi, ibyo bikaba n’ubundi byarashimangiraga umuco usanzwe muri iki gihugu aho usanga umugabo yubahwa kubera umubare w’abagore atunze.

KANDA HANO UREBE VIDEOS UTASANGA AHANDI