Kubera ubucye bw’abasore, buri wese akundana n’abakobwa byibuze 3 mu buryo buzwi

Chief Editor | 9-06-2016
Kubera ubucye bw’abasore, buri wese akundana n’abakobwa byibuze 3 mu buryo buzwi

Mu mujyi wa Dongguan wo mu ntara ya Guangdong mu gihugu cy’u Bushinwa, bimaze kuba umuco ko buri musore aba agomba kugira byibuze abakobwa bakundana batatu, bitewe n’ikibazo cy’ubucye bw’abasore cyugarije abakobwa batuye muri uwo mujyi.

Bamwe mu batuye muri uyu mujyi, kubera kubimenyera bavuga ko batiyumvisha uko byaba bimeze mu gihe umusore yakundana n’umukobwa umwe wenyine, kuko ibisanzwe ari ukumubona akundana na batatu cyangwa barenzeho.

Muri uyu mujyi wa Dongguan, abakoresha benshi bishakira guha akazi abakobwa, bigatuma umubare w’abakobwa uba munini cyane ugereranyije n’uw’abasore, cyane ko hari abasore banga kuwubamo kuko bazi ko batapfa kuwubonamo akazi.

Urubuga News.com.au, ruvuga ko umwe mu basore batuye muri uyu mujyi, yatangaje ko iyo uhageze uri umusore kuhabona akazi bitoroshye, mu gihe bitagoye na mba guhita uhabona umukobwa mukundana, kuko abatari bacye bahita babikwisabira.

Umusore witwa Li Bin ukora mu ruganda ruri mu mujyi wa Dongguan, we yagize ati: "Mfite abakobwa batatu dukundana, kandi bose baraziranye. Abahungu benshi b’inshuti zanjye nabo birasanzwe ko usanga bafite abakunzi benshi kandi baziranye nta byo guhishahisha."

Uwitwa Xiao Lin we yagize ati: "Abakobwa bakiri bato kandi bafite uburanga usanga hano bahari ku bwinshi. Bariyoroshya kandi ntibangira abasore ko bababangikanya n’abandi bakobwa benshi. Byaba ari igisebo ahubwo kubona umusore ufite umukunzi umwe, buri wese yamuseka."

Ikinyamakuru The Mirror cyo mu Bwongereza, cyo kivuga ko abagabo benshi bo mu mujyi wa Dongguan, usanga bakora akazi gaciriritse mu gihe abagore bo bahabwa akazi keza ku bwinshi, ibyo bigatuma umusore ashaka abakobwa benshi bakundana kandi buri umwe muri abo akaba agomba kumwishyurira bimwe mu byo aba akeneye mu buzima bwa buri munsi.

Aba bakobwa ngo nta n’umwe ukunda umusore amukurikiyeho amafaranga kuko nta n’umukobwa ubura akazi keza mu mujyi wa Dongguan, ahubwo rimwe na rimwe usanga hari umusore utagira akazi nyamara afite abakobwa batatu cyangwa barenga, akundana nabo kandi bose bafite akazi kabahemba menshi.

KANDA HANO UREBE VIDEOS UTASANGA AHANDI