Umugabo yamize ibyuma 40, abaganga nabo barumiwe - Amafoto

Chief Editor | 21-08-2016
Umugabo yamize ibyuma 40, abaganga nabo barumiwe - Amafoto

Umugabo wo mu gihugu cy’u Buhinde yabazwe n’inzobere z’abaganga nyuma yo kujyanwa mu bitaro ababara mu nda, aba baganga baza kumera nk’abakubiswe n’inkuba ubwo basangaga ibyuma 40 mu gifu cy’uwo mugabo, nawe abahishurira ko yabimize kuko yumvaga bimuryoheye.

Bamwe barabyita amashitani n’imyuka mibi, abandi bakabyita kugira imbaraga zidasanzwe, ibanga n’ubuhanga yihariye, ndetse na we ubwawe ufite ukundi ushobora kubyita ariko byabayeho n’abaganga barumirwa, bahura n’amayobera badasanzwe babona mu mwuga wabo.

Jarnail Singh w’imyaka 42 y’amavuko, yajyanywe mu bitaro byo mu Buhinde byitwa "The Corporate Hospital" biherereye mu gace ka Gurdaspur, nyuma y’uko yari amaze iminsi micye ababara mu nda.

Itsinda ry’abaganga b’inzobere mu kubaga, bashatse kwiruka nyuma yo gukurwa umutima n’ibyuma bigera kuri 40 basanze mu gifu cya Jarnail, nawe ubwe akabahamiriza ko amaze amezi abiri arya ibyo byuma kuko yumvaga bimuryoheye.

Umwe muri aba baganga batanu witwa Dr Jitinder Malhotra, yabwiye ikinyamakuru Daily Mail ko mu myaka 20 amaze akora akazi k’ubuganga mu ishami ryo kubaga abarwayi, ari ubwa mbere yahura n’ibintu nk’ibi.

Yagize ati: "Ubwo twatangiraga kumusuzuma, twabanje kuyoberwa aho uburibwe afite bukomoka. Twamucishije mu cyuma, tuza kubona ibintu byinshi bikomeye mu gifu cye, tugirango ni kanseri. Umurwayi ubwe yahise atwibwirira ko yari amaze igihe afite inzara idasanzwe yo kurya ibyuma. Igitangaje kandi giteye urujijo, yari amaze amezi abiri yose arya ibyo byuma. Ibi birenze ubwenge bwanjye, kuva naba umuganga nibwo nabona ibintu nk’ibi."

Nyuma y’amasaha atanu abaganga babaga Jarnail Singh, bemeje ko ubu agenda amera neza ndetse mu minsi micye akaba azasezererwa akava mu bitaro.

KANDA HANO UREBE VIDEOS UTASANGA AHANDI