Umwana yasanzwemo impanga ye yari imaze amezi 15 yibera mu nda ye

Rukundo Irené | 10-08-2016
Umwana yasanzwemo impanga ye yari imaze amezi 15 yibera mu nda ye

Nyuma y’uko ababyeyi b’umwana witwa Nisha umaze amezi 15 abonye izuba babonye afite ikibazo cyo kubyimba inda cyane ndetse akaba yarahoraga arira nta n’ikintu akoza mu kanwa, bamujyanye kwa muganga biza kugaragara ko yavutse mu nda ye harakuriyemo urusoro rw’uwari kuzavuka ari impanga ye.

Ababyeyi b’uyu mwana babanje kugira ngo ni ikibazo cy’uburwayi bubaho butuma imikaya y’uruhande rwo kunda ibyimba, ariko byaje kubatera ikibazo nyuma yo kubona uyu mwana muto atabasha kugira ikintu yatamira cyangwa se ngo agire icyo yanywa. Bahise bafata umwanzuro wo kujyana umwana ku bitaro byitwa Sri Ganapathy Krishna biherereye mu gace ka Tamil Nadu.

Abaganga bagitangira gukurikirana uburwayi uyu mwana yaba afite nabo babanje gukeka ko byaba ari uburwayi busanzwe butuma mu nda y’umuntu harekamo amazi bigatuma habyimba cyane aribyo bita “cyst” ariko nyuma yo kumunyuza mu cyuma batunguwe no gusanga mu nda ye hari ikindi kintu cyakuriyemo. Bahise batangira kubaga ngo bakuremo icyo kiremwa cyakuriye mu nda ya Nisha, byagaragaraga ko gifite n’amagufwa. Ni igikorwa cyatwaye amasaha abiri kandi cyari kigoranye kuko kuzahara k’uyu mwna byari bitangiye kugenda bisatira impyiko ye.

Dr Vijayagiri wakoze iki gikorwa cyo kumubaga, mu kiganira n’ikinyamakuru Daily Mail yagize ati: “Ubwa mbere nabanje gukeka ko ari uburwayi busanzwe bwo kubyimba, ariko tukimara kumunyuza mu mashini twabonye munda ye harimo agace kagaragaza amagufwa ndetse bikaboneka ko ari imitsi yahuye ikarema ikintu munda.”

Sumathi w’imyaka 28, umwe mu babyeyi ba Nisha, yavuze ko babonaga inda yarabyimbye cyane kurusha iy’umuntu muzima ariko bagakomeza kubireka. Akomeza agira ati: “Inda yari yarabyimbye cyane, tuza kugenda tubireka tuzi ko bizakira ariko nyuma byageze aho atangira kujya arira ubudatuza ndetse atangira no kugira ikibazo mu myanya y’ubuhumekero, no kurya biranga nibwo twahise tumujyana kwa muganga.” Uyu muyeyi akomeza ashimira abaganga bakoze iki gikorwa bagafasha umwana we kongera kugira ubuzima busanzwe.

JPEG - 84.5 kb

Kugeza ubu, abaganga baratangaza ko ubuzima bwa Nisha bumeze neza kandi ko agenda yoroherwa ndetse akaba azava mu bitaro mu minsi micye iri imbere.

KANDA HANO UREBE VIDEOS UTASANGA AHANDI