APR FC yaba yahaniye abakinnyi bayo ibyo bakoze ku mukino batsinzwemo na Espoir

Chief Editor | 25-05-2016
APR FC yaba yahaniye abakinnyi bayo ibyo bakoze ku mukino batsinzwemo na Espoir

Ku mugoroba wo kuri uyu wa Kabiri tariki 24 Gicurasi 2016, nibwo ubuyobozi bwa APR FC bwahamije amakuru y’uko aabakinnyi bakomeye muri iyi kipe bahagaritswe kubera imyitwarire mibi, abo bakaba ari Iranzi Jean Claude, Emery Bayisenge, Ndahinduka na Tumaini bahagaritswe kugeza igihe kitaramenyekana. N’ubwo APR FC itatangaje impamvu yabyo, amakuru agera ku kinyamakuru Ukwezi.com ahamya ko bazize ibyakurikiye umukino iyi kipe yatsinzwemo na Espoir FC i Rusizi.

Kuwa Gatandatu tariki 21 Gicurasi 2016, ubwo habaga umukino wa shampiyona y’igihugu y’umupira w’amaguru wahuje ikipe ya APR FC iri ku mwanya wa mbere ku rutonde rwa shampiyona na Espoir y’i Rusizi, iyi kipe y’ingabo z’igihugu yongeye gusubirwa n’iyi kipe yaherukaga kuyitsinda umwaka ushize mu mukino wakurikiwe n’imvururu, ibi bikaba bitarashimishije ubuyobozi bwa APR FC irimo kurwanira igikombe na mukeba wayo Rayon Sports.

Amakuru ikinyamakuru Ukwezi.com gikesha umwe mu bakinnyi ba APR FC utashatse ko dutangaza amazina ye, ashimangira ko aba bakinnyi bakomeye muri APR bazize kuba bararangije gukina uyu mukino batsinzwe bagatinda i Rusizi aho bari muri hoteli, ibi bikaba byarafashwe nko kutagira icyo babwirwa no kuba bari bamaze gutakaza amanota, bagahitamo gusigara bishimisha kandi bataritwaye neza mu kibuga.

Gutsindwa na Espoir FC byababaje cyane ubuyobozi bwa APR FC binagabanya amahirwe iyi kipe ifite yo kuba yakwegukana igikombe cya shampiyona, dore ko Rayon Sports yitwaye neza mu mikino itandatu isigaje yahita yegukana igikombe.

KANDA HANO UREBE VIDEOS UTASANGA AHANDI