APR FC yabonye intsinzi biyoroheye ikomeza kurusha Rayon Sports amanota

Chief Editor | 15-05-2016
APR FC yabonye intsinzi biyoroheye ikomeza kurusha Rayon Sports amanota

Kuri iki cyumweru tariki 15 Gicurasi 2016, nibwo ikipe ya APR FC yasuye AS Muhanga ibasha kuyitsindirayo itayibabariye, biyihesha gukomeza kuyobora urutonde rwa shampiyona by’agateganyo, mu gihe shampiyona yari igeze ku munsi wayo wa 24.

Ikipe ya Rayon Sports irimo guhanganira igikombe na APR FC, yo kuri uyu wa Gatandatu yanganyirije i Rwamagana mu mukino yari yahuriyemo na Sunrise bikarangira nta kipe yinjije igitego mu izamu ry’indi, bituma irara ku mwanya wa mbere by’agateganyo ariko APR FC yatsinze AS Muhanga bituma ihita iyobora izindi.

Uyu mukino wa AS Muhanga na APR FC, wari utegerejwe cyane dore ko iyi kipe yo mu majyepfo ikinamo rutahizamu wabiciye bigacika mu myaka yashize, uwo akaba ari Bokota Labama wavuye muri APR FC yirukanwe, benshi bakaba bari biteze ko ashobora kuyihimuraho akabatsinda ibitego.

Ntacyo AS Muhanga yabashije kwigezaho ariko, kuko APR FC yayitsinze itayibabariye ibitego 3-0, biyihesha guhita igira amanota 55 mu gihe Rayon Sports iyikurikiye yo ifite amanota 52, mu gihe hasigaye imikino itandatu kuri buri kipe, uretse ko Rayon Sports ifite umukino umwe w’ikirarane.

KANDA HANO UREBE VIDEOS UTASANGA AHANDI