APR FC yakoze amateka, yegukana igikombe itsinze Vita Club ikinamo Sugira Ernest

Chief Editor | 17-09-2016
APR FC yakoze amateka, yegukana igikombe itsinze Vita Club ikinamo Sugira Ernest

Ikipe ya APR FC yakoze amateka ibasha gutsinda ikipe ya Vita Club yo muri Repubulika Iharanira Demokarasi ya Kongo, ku mukino wa nyuma w’irushanwa ryateguwe na AS Kigali, ikaba yabashije gutwara igikombe iyi kipe yo mu gihugu cy’abaturanyi iyitsinze igitego 1-0 cyatsinzwe na Onesme.

APR FC yageze ku mukino wa nyuma itsinze mukeba wayo Rayon Sports ibitego 3 byose ku busa, yabashije no kwihagararaho imbere y’iyi kipe ya Vita Club yaje mu Rwanda izanye ibihangange byayo birimo n’umunyarwanda Sugira Ernest yaguze akayabo k’amafaranga y’u Rwanda arenga miliyoni ijana. Umukino wose muri rusange, ikipe ya APR FC yagaragaje umukino mwiza, kugeza ubwo igitego rukumbi cyabonetse muri uyu mukino cyabonetse mu minota ya nyuma y’umukino.

Ntibisanzwe ko ikipe yo mu Rwanda ibasha gutsinda ikipe yo muri Repubulika Iharanira Demokarasi ya Kongo, by’akarusho noneho APR FC yabigezeho ibashije gutsinda Vita Club ku mukino wa nyuma aho zakinaga igikombe kibateretse imbere. Umukoza wa Vita Club, nyuma y’umukino yavuze ko APR FC ari ikipe yo gushimirwa, anagaruka kuri Sugira Ernest yavuze ko ari umukinnyi mwiza ariko akaba afite byinshi byo gukosora.

Ikipe ya Rayon Sports nayo yabashije kwegukana umwanya wa gatatu nyuma yo gutsinda Kiyovu Sports ibitego 3-0. Ikipe ya AS Kigali yateguye aya marushanwa yo ntiyabashije kugera muri kimwe cya kabiri.

KANDA HANO UREBE VIDEOS UTASANGA AHANDI