APR FC yatsindiwe aho iheruka guteza imvururu, biha Rayon Sports amahirwe

Chief Editor | 21-05-2016
APR FC  yatsindiwe aho iheruka guteza imvururu, biha Rayon Sports amahirwe

Aha ni ku mukino wabaye umwaka ushize, APR igateza imvururu nyuma yo gutsindwa

Kuri uyu wa Gatandatu tariki 21 Gicurasi 2016, mu mukino wa shampiyona y’igihugu y’umupira w’amaguru wahuje ikipe ya APR FC iri ku mwanya wa mbere ku rutonde rwa shampiyona na Espoir y’i Rusizi, iyi kipe y’ingabo z’igihugu yongeye gusubirwa n’iyi kipe iheruka kuyitsinda mu mukino wakurikiwe n’imvururu.

Mu mukino wa 26 wa shampiyona, APR FC yatsindiwe i Rusizi na Espoir FC yayitsinze igitego 1-0, intsinzi nk’iyi ikaba ari nayo yabonetse muri Werurwe 2015, maze umukino ugakurikirwa n’imvururu. Uwo mukino wahesheje ikarita y’umutuku Mugiraneza Jean Baptiste bita Migi wari ugikinira APR FC, ndetse nyuma iyi kipe y’ingabo z’u Rwanda yahawe ibihano kubera guteza imvururu.

Gutsindwa kwa APR FC kuri uyu mukino, byagaruriye Rayon Sports ya kabiri icyizere cyo kuba yakwegukana igikombe cya shampiyona y’uyu mwaka, cyane ko ubu APR FC ya mbere ifite amanota 58 Rayon Sports ikagira amanota 53 ariko APR FC ikaba isigaje gukina imikino 4 mu gihe Rayon Sports igifite imikino yayo 6.

Undi mukino wabaye kuri uyu wa Gatandatu, ni uwahuje Gicumbi FC na Sunrise ukarangira Gicumbi itsinze 2-1, mu gihe indi mikino yari iteganyijwe ari uwa AS Muhanga na Rayon Sports ndetse n’uwa Etincelles yagombaga kwakira Marines ariko iyi mikino yombi ikaba yasubitswe.

KANDA HANO UREBE VIDEOS UTASANGA AHANDI