Abatoza bari bahawe gutoza Amavubi birukanywe nyuma y’umunsi umwe batangiye akazi

Chief Editor | 23-08-2016
Abatoza bari bahawe gutoza Amavubi birukanywe nyuma y’umunsi umwe batangiye akazi

Nyuma yo kugirwa abatoza b’ikipe y’igihugu Amavubi ndetse bagahita bahamagara n’abakinnyi bazifashisha mu mukino u Rwanda ruzakina na Ghana, abatoza babiri b’abanyarwanda Kanyankole Gilbert Yaounde na Eric Nshimiyimana wari ubungirije, bahise birukanwa bataranamara iminsi itatu mu kazi.

Kuri uyu wa Mbere tariki 22 Kanama 2016, nibwo Kanyankole Gilbert Yaounde, yahamagaye abakinnyi 26 bazifashishwa ku mukino u Rwanda ruzakina na Ghana tariki 3 Nzeri 2016 mu rwego rwo guhatanira itike y’imikino ya nyuma y’igikombe cya Afurika, none Minisiteri y’Umuco na Siporo yahise imuhamagara we na Eric Nshimiyimana wari umwungirije ihita ibabwira ko bahagaritswe kandi ko ikipe igiye gushakirwa abandi batoza.

Kugeza ubu Kanyankole Gilbert Yaounde na Eric Nshimiyimana nabo ntibasobanura impamvu bakeka yaba yatumye bahita birukanwa batamaze kabiri, mu gihe kuri uyu wa Mbere ari bwo bari batangiye akazi kabo.

Mu kiganiro Ikinyamakuru Ukwezi.com cyagiranye na Minisitiri Uwacu Julienne uyobora Minisiteri y’Umuco na Siporo ku murongo wa telefone, yadutangarije ko atari ku kazi ndetse atumenyesha ko twabivugana n’umunyamabanga uhoraho w’iyi Minisiteri ariko ntiyabashije kwitaba telefone ye igendanwa.

Hari amakuru agera ku Kinyamakuru Ukwezi.com ashimangira ko kwirukanwa igitaraganya kw’aba batoza byatewe n’uburyo bahagamagaye abakinnyi batabikwiye, bakagira abo birengagiza bari bagaragaje ko bashoboye.

KANDA HANO UREBE VIDEOS UTASANGA AHANDI