Argentine ya Lionel Messi yabuze igikombe, Chili iyikoreraho amateka

Chief Editor | 27-06-2016
Argentine ya Lionel Messi yabuze igikombe, Chili iyikoreraho amateka

Ikipe y’igihugu ya Argentine iyobowe na Messi, yatsinzwe na Chili ku mukino wa nyuma w’igikombe cya Copa Amerika Centenario, iyi kipe ikaba yasubiriye Argentine ibasha kuyitsinda ku mukino wa nyuma imyaka ibiri ikurikiranye kandi yose ibatsinda nta gitego na kimwe cyabashije kwinjira mu minota isanzwe cyangwa iy’inyongera.

Umukino wa nyuma w’igikombe cya Copa Amerika, watangiye saa munani z’igicuku cyo ku Cyumweru gishyira kuri uyu wa Mbere, uhuza Argentine na Chili. Wari umukino ukomeye cyane wabayemo guhangana gukomeye ndetse unatangwamo amakarita atukura ku mpande zombi, harimo iyahawe Marcelo Diaz wa Chili ku munota wa 28 w’umukino ndetse n’iyahawe Marcos Rojo wa Argentine ku munota wa 43 w’umukino.

Uyu mukino wari ishiraniro, amakipe yombi yahanganye bigaragara

Guhabwa amakarita atukura kw’amakipe yombi byatumye igice cya kabiri bagikina batuzuye

Guhangana no kotsanya igitutu ku mpande zombi, ntacyo byatanze ku bijyanye no kwinjiza igitego kuko n’ubwo ibi bihugu byombi bifite ba rutahizamu bakomeye, nta wabashije kuboneza mu izamu, haba mu gice cya mbere cy’umukino, mu gice cya kabiri cy’umukino ndetse no mu minota 30 y’inyongere yitabajwe ariko rukabura gica.

Amakipe yombi yashakishije ibitego ariko biranura neza neza

Nta kindi cyagombaga gukurikiraho, ni penaliti zagombaga gukemura impaka. Ba rutahizamu bakomeye ku mpande zombi nibo babanje gutera penaliti, bose bananirwa kuzinjiza. Ku ruhande rwa Argentine, Lionel Messi yananiwe kwinjiza iya mbere mu gihe Arturo Vidal wa Chili nawe yayihushije.

Abandi bakinnyi ba Chili bose ariko babashije gutera neza penaliti zabo, naho Argentine iza kongera guhusha indi yatewe na Lucas Biglia bituma Chili ihita yegukana igikombe kuri penaliti 4 kuri 2, cyane ko Argentine bitari ngombwa ko yirirwa itera iya nyuma.

Ibi ni amateka asa n’ayisubiyemo, kuko mu mwaka ushize wa 2015 nabwo aya makipe yahuriye ku mukino wa nyuma wa Copa Amerika, nabwo iminota 90 y’umukino irangira ari 0-0 ndetse hanongerwaho 30 ntibyahinduka, birangira Chili itsinze kuri penaliti 4-1.

Photos: AFP/Getty Images

KANDA HANO UREBE VIDEOS UTASANGA AHANDI