Atletico Madrid yabereye ibamba Bayern Munich ihita igera ku mukino wa nyuma

Chief Editor | 4-05-2016
Atletico Madrid yabereye ibamba Bayern Munich ihita igera ku mukino wa nyuma

Kuri uyu wa Kabiri tariki 3 Gicurasi 2016, nibwo habaye umukino wa mbere wo kwishyura muri kimwe cya kabiri cy’irushanwa ry’amakipe yabaye ayambere iwayo (Champions League), umukino wahuje Bayern Munich yo mu Budage yari yakiriye Atletico Madrid yo muri Esipanye.

Nyuma y’uko mu mukino ubanza wabereye muri Esipanye ikipe ya Atletico yari yabanje gutsinda igitego 1-0, Bayern Munich yari ifite akazi ko kwishyura ikanatsinda ariko ntibyaje kuyorohera, kuko n’ubwo yatsinze uyu mukino wo kwishyura, igitego yatsindiwe ku kibuga cyayo cyayikozeho.

Ku munota wa 31 w’umukino, Xabi Alonso yabonye igitego cya mbere icyizere cyo kwegukana intsinzi gitangira kuza ku ruhande rwa Bayern Munich. Ku munota wa 34 w’umukino, ikosa ryakozwe na Jose Gimenez mu rubuga rw’amahina rw’ikipe ye ya Atletico Madrid, ryahesheje Bayern Munich penaliti ariko Thomas Mueller wayiteye ananirwa kuyinjiza mu izamu.

Ku munota wa 54 w’umukino, Antoine Griezmann wa Atletico Madrid yatsinze igitego cyo kwishyura, bihita biha akazi katoroshye Bayern Munich kuko kugirango itsinde yasabwaga gutsinda ibindi bitego bibiri.

Ku munota wa 74 w’umukino, Robert Lewandowski yatsindiye Bayern Munich igitego cya kabiri, biba bibaye 2-1 ariko ntibyari bibagije ngo ikipe ye itahukane intsinzi. Uyu mukino wari ukomeye, kuburyo amakipe yombi yageragezaga kotsanya igitutu mu buryo bugaragara.

Ku munota wa 84 w’umukino, Javier Martinez yakoze ikosa mu rubuga rw’amahina rw’ikipe ye ya Bayern Munich, bituma Atletico ibona penaliti ariko Fernando Torres wahawe kuyitera nawe ntiyabasha kuyinjiza mu izamu.

Umukino warangiye ari ibitego 2-1, hanyuma kuko umukino ubanza wari warangiye Atletico itsinze 1-0, igiteranyo cy’ibitego kiba 2-2 ariko Atletico Madrid iba ari yo ikomeza kuko yabashije gutsinda igitego ku kibuga cya Bayern Munich. Atletico Madrid yahise igera ku mukino wa nyuma wa UEFA Champions League, muri 2014 ikaba n’ubundi yarageze ku mukino wa nyuma igatwarwa igikombe na Real Madrid yayitsinze bigoranye.

KANDA HANO UREBE VIDEOS UTASANGA AHANDI