Barcelona yahigitse Real Madrid itwara igikombe cya shampiyona, Suarez nawe ahiga Cristiano

Chief Editor | 14-05-2016
Barcelona yahigitse Real Madrid itwara igikombe cya shampiyona, Suarez nawe ahiga Cristiano

Ikipe ya FC Barcelona, yamaze kwegukana igikombe cya shampiyona yo muri Espagne nyuma yo kwitwara neza ku mukino wayo wa nyuma wa shampiyona, Real Madrid nayo ikaba yitwaye neza ariko ntibyagira icyo biyimarira ko gutsindwa cyangwa kunganya kwa Barcelona ari byo yari itegereje ko byayihesha amahirwe yo gukoza imitwe y’intoki ku gikombe.

Kuri uyu wa Gatandatu, ikipe ya Real Madrid yagombaga gusanga Deportivo La Coruna ku kibuga cyayo mu gihe Barcelona nayo yagombaga gusanga Granada ku kibuga cyayo, amakipe yombi akaba yabyitwayemo neza abifashijwemo na ba rutahizamu bayo bagiye n’ubundi bayafasha kwitwara neza mu mikino itandukanye.

Real Madrid yatsinze ibitego 2-0 byombi byatsinzwe n’ikirangirire Cristiano Ronaldo, mu gihe FC Barcelona yatsinze ibutego 3-0 byose byatsinzwe na Luis Suarez, uyu ahita anegukana igihembo cy’urukweto rwa zahabu ruhabwa uwatsinze ibitego byinshi muri shampiyona.

Ikipe ya FC Barcelona yatwaye igikombe ifite amanota 91, mu gihe Real Madrid ya kabiri isoje ifite amanota 90. FC Barcelona yamaze kwegukana igikombe cyayo cya mbere, ikaba inafite amahirwe yo kwegukana icya Copa Del Rey, mu gihe amahirwe ya Real Madrid asigaye ari ayo kwegukana igikombe cya Champions League.

KANDA HANO UREBE VIDEOS UTASANGA AHANDI