Chelsea na Liverpool zatsinze, Bayern Munich iratungurwa. Reba uko indi mikino yagenze

Parfait Mutabazi | 2-10-2016
Chelsea na Liverpool zatsinze, Bayern Munich iratungurwa. Reba uko indi mikino yagenze

Mu bihugu bitandukanye bifite shampiyona zikurikiranwa cyane ku isi nko mu Bwongereza, shampiyona zari zakomeje aho amakipe amwe n’amwe afite abafana benshi yari afite imikino, amwe aratungurwa andi nayo akomeza guhamya ko akomeye kandi afite igitinyiro.

Duhereye mu Bwongereza, ku isaha ya saa saba nibwo Liverpool yasuye Swansea City, umukino watangiye ubona Liverpool irushwa cyane na Swansea ndetse byatumye Swansea ibona igitego hakiri kare. Ku munota wa 8 nibwo igitego cya mbere cya Swansea City cyabonetse. Nta kindi kidasanzwe cyabaye mu gice cya mbere uretse abakinnyi bagiye babona amakarita y’imihondo n’abasimbujwe.

Igice cya kabiri cyatangiye Liverpool isatira cyane amazamu, ubona ko ishaka kwishyura ndetse ntibyatinda ku munota wa 54 umunya Bresil Roberto Filmino yaje gushyiramo igitego cya mbere ku mupira yari anawe neza na Kapiteni we Jordan Hendersson. Umukino wakomeje kugeza ku munota wa 80 aho Roberto Filmino yaje gukorerwaho ikosa mu rubuga rw’umunyezamu, umusifuzi atanga penaliti yatewe neza na James Milner, birangira Liverpool itahanye amanota atatu y’umunsi.

Umukino wa kabiri wahuje Chelsea na Hull City. Umukino watangiye ubona nta gahunda amakipe yombi afite yo gutsinda, ahubwo bakoraga amakosa menshi byanatumye umukinnyi nka Matic ahabwa ikarita y’umuhondo ku munota wa 35, na Moses ku munota wa 41. Mu gice cya kabiri Chelsea yaje yariye karungu maze ku munota wa 61 Willian ashyiramo igitego cya mbere. Ntibyatinze ku munota wa 67 umusore Diego Costa ashyiramo igitego cya kabiri ari nako umukino warangiye.

Dore muri rusange uko imikino yagenze

Sunderland 1 vs 1 West Bromwich

Watford 2 vs 2 AFC Bournemouth

West Ham United 1 vs 1 Middesbrough

Swansea City 1 vs 2 Liverpool

Hull City 0 vs 2 Chelsea

Mu bindi bihugu twababwira ko Paris Saint Germain nyuma yo kumara igihe ititwara neza, noneho yaje gutsinda Bordeaux ibitego 2 kubusa naho MONACO yatsinze Metz ibitego 6 ku busa. Mu budage ikipe ya Bayern Munich ikaba yatunguwe na FC Cologne maze banganya 1-1, Bayern Liverkussen itsinda Borussia Dortmund 2 kubusa

KANDA HANO UREBE VIDEOS UTASANGA AHANDI