Cristiano Ronaldo ayoboye abakinnyi mu mikino yose binjije akayabo muri 2016 - Urutonde

Chief Editor | 9-06-2016
Cristiano Ronaldo ayoboye abakinnyi mu mikino yose binjije akayabo muri 2016 - Urutonde

Icyamamare mu mupira w’amaguru, Cristiano Ronaldo, niwe mukinnyi mu bakina imikino yose, wa mbere ku isi mu kwinjiza amafaranga menshi mu mwaka wa 2016 nk’uko bigaragazwa na Forbes Magazine.

Uyu mukinnyi ukomoka muri Portugal akaba akinira ikipe ya Real Madrid, yaje imbere y’ibindi byamamare mu mupira w’amaguru, muri Tennis, muri Basketball, Golf n’indi mikino isanzwe ibamo abaherwe.

Kuri uru rutonde, Cristiano Ronaldo akurikiwe na Lionel Messi ukinira FC Barcelona, ku mwanya wa gatatu hakaza umukinnyi wa Basketball muri NBA witwa LeBron James.

JPEG - 33.3 kb

Cristiano Ronaldo uyoboye abandi, kugeza tariki 1 Kamena 2016 yari amaze kwinjiza miliyoni 88 z’amadolari (arenga 70.000.000.000 uyabaze mu mafaranga y’u Rwanda). Muri aya harimo miliyoni 56 z’amadolari yinjije binyuze mu mushahara ahembwa, hakabamo na miliyoni 32 z’amadolari yinjije mu bijyanye no kwamamaza.

Ni ubwa mbere guhera mu mwaka wa 2000, uyu mwanya wa mbere utwawe n’undi mukinnyi utari umuteramakofe Floyd Mayweather cyangwa umukinnyi wa golf witwa Tiger Woods, dore ko aba ari bo bagendaga basimburanwa kuri uyu mwanya wa mbere muri iyo myaka yose.

JPEG - 784 kb

Tiger Woods na Floyd Mayweather nibo bahoraga basimburanwa ku mwanya wa mbere

Cristiano Ronaldo kandi akurikiwe na Lionel Messi wa kabiri winjije miliyoni 81.4 z’amadolari ya Amerika, ni ukuvuga hafi 65.000.000.000 uyabaze mu mafaranga y’u Rwanda. LeBron James uri ku mwanya wa gatatu, we yinjije miliyoni 77.2 z’amadolari, ni ukuvuga arenga 61.000.000.000 uyabaze mu mafaranga y’u Rwanda.

LeBron James wa gatatu, yarushije Cristiano na Messi kwinjiza menshi mu bijyanye no kwamamaza, kuko yabikuyemo miliyoni 54 z’amadolari, ariko bamurushije igiteranyo kubera umushahara wabo munini, dore ko we umushahara wamwinjirije miliyoni 23.2 z’amadolari.

Muri uru rutonde rw’abinjije menshi, abakinnyi ba Basketball benshi bagaragara mu 10 ba mbere. Kuri LeBron James wa gatatu, hiyongeraho Kevin Durant uri ku mwanya wa 5 na miliyoni 56.2 z’amadolari, ndetse na Kobe Bryant uza ku mwanya wa 10 na miliyoni 50 z’amadolari.

Ibihangange mu mukino wa Tennis, nabyo bigaragara kuri uru rutonde, Roger Federer akaba ari ku mwanya wa kane na miliyoni 67.8 z’amadolari naho Novak Djokovic akaba ku mwanya wa 6 na miliyoni 55.8 z’amadolari.

Umukinnyi w’umupira w’amaguru wo muri Amerika (NFL) nawe aza kuri uru rutonde rw’abambere 10, uwo akaba ari Cam Newton uri ku mwanya wa 7 na miliyoni 53.1 z’amadolari.

Abakinnyi ba golf bagaragara mu 10 ba mbere, ni Phil Mickelson wa 8 na miliyoni 52.9 z’amadolari ndetse na Jordan Spieth wa 9 na miliyoni 52.8 z’amadolari. Uyu Jordan Spieth niwe wakoze agashya, kuko mu mwaka ushize wa 2015 yari ku mwanya wa 85, bivuga ko yigiye imbere ho imyanya 76 yose.

KANDA HANO UREBE VIDEOS UTASANGA AHANDI