Cristiano Ronaldo yajugunye indangururamajwi y’umunyamakuru mu kiyaga

Chief Editor | 22-06-2016
Cristiano Ronaldo yajugunye indangururamajwi y’umunyamakuru mu kiyaga

Cristiano Ronaldom, Kapiteni w’ikipe y’igihugu cya Portugal akaba na rutahizamu w’ikipe ya Real Madrid yo muri Esipanye, yagaragaje uburakari n’umujinya ukabije ajugunya indangururamajwi (microphone) y’umunyamakuru baganiraga.

Ibi byabaye kuri uyu wa Gatatu, ubwo umunyamakuru Diogo Torres wa CMTV yageragezaga kubaza Cristiano Ronaldo ibibazo bijyanye n’ikipe ya Portugal ayoboye nka kapiteni, undi n’uburakari amushikuza indanguramajwi ayijugunya mu kiyaga cyari yafi y’aho baganiriraga.

Aganira na BBC, uyu munyamakuru Diogo Torres yagize ati: "Nabajije Ronaldo niba yiteguye umukino wari ugiye kubahuza na Hongiriya. Ntiyigeze ansubiza, ahubwo yanshikuje indangururamajwi yanjye ayijugunya mu kiyaga."

Uyu munyamakuru avuga ko atazi impamvu Cristiano Ronaldo yakoze ibi, ariko agakeka ko byaba byatewe n’uko bajya bakora inkuru zigaragaza ko barimo kwitwara nabi mu mikino y’amarushanwa ya Euro 2016.

Ati: "Ntabwo mbizi neza, turi ikinyamakuru gikomeye cyo muri Portugal, dukora inkuru nyinshi kuri we, zimwe na zimwe ntabwo azishimira. Wenda niyo mpamvu yabikoze, ariko si ikintu kirimo ubumuntu."

Uyu munyamakuru avuga ko yaba Cristiano Ronaldo cyangwa ubuyobozi bw’ikipe ntawigeze amusaba imbabazi, nyamara ngo baraziranye kuko baje mu ndege imwe bava muri Portugal bajya mu Bufaransa, bakaba bagomba no kuzasubiranayo.

KANDA HANO UREBE VIDEOS UTASANGA AHANDI