AMAKURU

UKWEZI

David Beckham yakozwe ku mutima n’abana bazahajwe na SIDA muri Afurika - Amafoto

David Beckham yakozwe ku mutima n’abana bazahajwe na SIDA muri Afurika - Amafoto
8-06-2016 | By Chief Editor | Yasomwe n'abantu 2916 | Ibitekerezo

David Beckham wabaye umukinnyi w’icyamamare mu mupira w’amaguru haba mu ikipe y’igihugu cye cy’u Bwongereza no mu makipe nka Manchester United na Real Madrid, yakozwe ku mutima n’abana bari mu kigero cy’abe yasuye muri Swaziland, aba bana bakaba babana n’ubwandu bw’agakoko gatera SIDA.

David Beckham wahoze ari Kapiteni w’ikipe y’igihugu cy’u Bwongereza, yasuye aba bana bo mu gace ka Makhewu muri iki gihugu cya Swaziland giherereye muri Afurika y’Amajyepfo, akorwa ku mutima n’ubuzima babayemo.

David Beckham w’imyaka 41 y’amavuko, kuba nawe ari umubyeyi byatumye ababazwa cyane no kubona abana bari mu kigero cy’abe babana n’ubwandu bw’agakoko gatera SIDA. Uretse aba bana, yabashije no gusura bamwe mu babyeyi babo.

Nyuma yo kuganira nabo, uyu mugabo yiyumviye inkuru z’ubuzima butoroshye babamo, bimukora ku mutima kandi bimutera agahinda. David Beckham ati: "Abenshi mu bana nahuye nabo, bari mu kigero cy’abana banjye, bamwe muri bo bakaba baratakaje umubyeyi umwe cyangwa bombi, ubu bakaba bibana kandi banafite ubwandu bwa virusi itera SIDA."

Beckham watangije ikigega kita ku bababaye abifashijwemo na UNICEF, yafashije bamwe mu bana n’ababyeyi batishoboye bo muri Swaziland babana n’ubwandu bwa SIDA, anasaba indi miryango kubagoboka kuko ari benshi cyane, dore ko iki gihugu ari cyo kibasiwe cyane n’icyorezo cya SIDA kurusha ibindi byose ku isi.

David Beckham n’umugore we Victoria Beckham wahoze aririmba mu itsinda rya Spice Girls, bafite abana bane, batatu bakuru bakaba ari abahungu, barimo Brooklyn Beckham w’imyaka 17, Romeo Beckham w’imyaka 13, Cruz Beckham w’imyaka 11 n’umukobwa w’imyaka 4 witwa Harper Beckham.


Tanga Igitekerezo
Ibitekerezo
IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA