Dusingizimana yanditse amateka atarigeze abaho ku isi, nyuma yo gukina amasaha 51 atarahagarara

Chief Editor | 13-05-2016
Dusingizimana yanditse amateka atarigeze abaho ku isi, nyuma yo gukina amasaha 51 atarahagarara

Eric Dusingizimana usanzwe ari Kapiteni w’ikipe y’igihugu cy’u Rwanda mu mukino wa Cricket, yaciye agahigo bituma ahita yandikwa mu gitabo cy’abaciye uduhigo agakora ikintu kitigeze kigerwaho n’undi muntu uwo ari we wese, nyuma yo kumara amasaha 51 yose, ni ukuvuga iminsi irenga ibiri akina adahagarara.

Tariki 11 Gicurasi 2016, guhera ku isaha ya saa mbiri za mugitondo, nibwo Eric Dusingizimana usanzwe ukinira ikipe y’igihugu mu mukino wa Cricket yatangiye uru rugendo rwagombaga kumara amasaha 51 agarura imipira yaterwaga n’abantu bagendaga basimburana, ubishatse wese akagenda yohereza udupira kuri uyu mukinnyi nawe atugarura, ibi bikaba byaberaga kuri Petit Stade Amahoro i Remera mu mujyi wa Kigali. Buri saha yabaga yemerewe gusa gufata amafunguro cyangwa ibinyobwa mu gihe cy’iminota 5 yonyine ubundi agakomeza.

Eric Dusingizimana wabashije kuzuza amasaha 51 mu masaha ya saa tanu zo kuri uyu wa Gatanu, abaye uwa mbere ukoze ayo mateka, aka gahigo akaba akambuye umuhinde witwa Virag Mare we wamaze amasaha 5o, bisobanura ko ubu nta wundi ku isi urabasha kumara amasaha agera kuri 51 nk’uko byakozwe n’uyu munyarwanda.

Eric Dusingizimana, ubu yamaze kwandikwa mu gitabo cyandikwamo abakoze amateka n’uduhigo tutigeze tugerwaho n’abandi ku isi yose, igitabo cyamamaye cyane kitwa World Guiness Records

KANDA HANO UREBE VIDEOS UTASANGA AHANDI