Euro 2016: Cristiano Ronaldo yaciye uduhigo 4 icyarimwe, Portugal ikomeza bigoranye

Chief Editor | 23-06-2016
Euro 2016: Cristiano Ronaldo yaciye uduhigo 4 icyarimwe, Portugal ikomeza bigoranye

Kuri uyu wa Gatatu tariki 22 Kamena 2016, nibwo hasojwe imikino yo mu matsinda mu marushanwa y’umupira w’amaguru ku bihugu byo ku mugabane w’u Burayi, hakaba hahise hamenyekana amakipe azakomeza ndetse n’uko azahura muri 1/8. Muri aya makipe, harimo na Portugal ya Cristiano Ronaldo waciye uduhigo tune kuri uyu munsi.

Kuva amarushanwa ya Euro 2016 yatangira, Cristiano Ronaldo ntabwo yari yabashije kureba mu izamu ariko byaramuhiriye kuri uyu wa Gatatu, mu mukino bakinnyemo na Hongiriya, bakabasha kunganya ibitego 3-3, yatsinzemo ibitego bye bibiri.

Cristiano Ronaldo yaciye agahigo ko gutsinda ibitego mu marushanwa ane akurikirana y’igikombe cy’u Burayi, dore ko yatsinze mu ya 2004, 2008, 2012 n’aya marushanwa ya 2016. Agahigo ka kabiri Cristiano Ronaldo yaciye, ni ako kuba umukinnyi wa mbere mu mateka watsinze ibitego byinshi mu marushanwa y’igikombe cy’u Burayi ubariyemo n’imikino y’amajonjora, aho amaze gutsinda ibitego 26.

Yanaciye agahigo kandi ko kuba ari we mukinnyi ugikina umupira w’amaguru ufite ibitego byinshi mu mikino ya nyuma y’aya marushanwa, kuko yujuje ibitego 8 kandi akaba abura kimwe ngo afate Michel Platini utagikina ariko watsinze byinshi kurusha abandi (yatsinze 9) mu mateka yose y’iri rushanwa.

Gukina uyu mukino ariko byonyine, byari agahigo Cristiano Ronaldo aciye ko kuba umukinnyi wa mbere ubashije gukina imikino ya nyuma myinshi y’igikombe cy’u Burayi, kuko uyu mukino wari uwa 17 mu gihe abari basanzwe barakinnye myinshi Lilian Thuram wahoze ari myugariro w’u Bufaransa na Edwin van der Sar wari umuzamu w’u Buholandi, bombi babashije gukina imikino 16. Cristiano ariko we n’iyi agomba kuyirenza kuko igihugu cye cyakomeje mu marushanwa, aho kizakina na Croatia muri 1/8.

AMAKIPE YOSE YAKOMEJE N’UKO AZAHURA MURI 1/8:

Kuwa Gatandatu:

Switzerland v Poland

Croatia - Portugal

Wales - Northern Ireland

Ku Cyumweru:

Hungary - Belgium

Germany - Slovakia

France - Republic of Ireland

Kuwa Mbere:

Italy - Spain

England - Iceland

KANDA HANO UREBE VIDEOS UTASANGA AHANDI