Euro 2016: U Budage bwasezereye u Butaliyani bwongera amahirwe yo gutwara igikombe

Chief Editor | 3-07-2016
Euro 2016: U Budage bwasezereye u Butaliyani bwongera amahirwe yo gutwara igikombe

Umukino wari utegerejwe na benshi kuri uyu wa Gatandatu mu mikino ya Euro 2016, wari umukino wahuje u Budage n’u Butaliyani, amakipe yombi akagwa miswi ariko ku bwa kamarampaka Abadage bakabasha gukomeza, bakiyongerera amahirwe yo kuba bakwegukana igikombe.

Wari umukino w’ishiraniro waranzwe no guhangana kw’amakipe yombi. Iminota isanzwe y’umukino, yarangiye ari 1-1 hitabazwa iminota 30 y’inyongera nabwo rubura gica.

Ku munota wa 65 w’umukino, nibwo Mesut Oezil yaboneye Abadage igitego cyabo cya mbere, ariko kiza kwishyurwa ku munota wa 78 biturutse kuri penaliti yaje kwinjizwa neza na Leonardo Bonucci.

Iminota 90 yarangiye nta yindi kipe ibashije kwinjiza igitego mu izamu ry’indi, hongerwaho indi 30 nabwo biranga, biba ngombwa ko hitabazwa penaliti ngo zimare impaka. Byaje kurangira u Budage butsinze nabwo bigoranye, kuko batsindanye penaliti 6 kuri 5.

Muri rusange bateye penaliti 9 bagenda banganya, ariko ku ya nyuma u Budage burayinjiza Abataliyani biranga bahita basezererwa. Abakinnyi bakomeye mu Budage nibo batabashije kwinjiza izabo. Abo ni Thomas Mueller, Mesut Oezil na Bastian Schweinsteiger 

KANDA HANO UREBE VIDEOS UTASANGA AHANDI