Ihuriro ry’abafana ba Arsenal mu Rwanda batanze inkunga irimo ihene 52 ku batishoboye

Chief Editor | 5-06-2016
Ihuriro ry’abafana ba Arsenal mu Rwanda batanze inkunga irimo ihene 52 ku batishoboye

Kuri uyu wa Gatandatu tariki 4 Kamena 2016, ihuriro ry’abafana b’abanyarwanda bakunda ikipe ya Arsenal yo mu Bwongereza, basuye urwibutso rwa Jenoside rwa Mukarange banaha imiryango 25 itishoboye ihene zizabafasha kwikura mu bukene no gukomeza kwiyubaka.

Mu rwego rwo kwerekana ko aba bafana ba Arsenal badahuzwa gusa n’umupira w’amaguru, bafashe icyemezo cyo kujya gusura urwibutso rwa Jenoside rwa Mukarange mu karere ka Kayonza, hanyuma banaremera abarokotse Jenoside batishoboye b’ahitwa i Nyawera.

Abaremewe, ni imiryango 25, buri muryango ukaba waragenewe ihene ebyeri bivuga ko bose bahawe ihene 50, hanyuma banongerwa amasekurume abiri azabafasha bose kubangurira kugirango zizororoke, muri rusange hakaba haratanzwe ihene 52.

Uretse izi hene batanze, abafana ba Arsenal banahaye urwibutso rwa Jenoside yakorewe abatutsi rwa Mukarange inkunga yo kurufata neza ingana n’amafaranga y’u Rwanda ibihumbi mirongo itanu (50.000).

Abahawe inkunga, bashimye cyane kuba abantu batandukanye bahujwe no gufana ikipe y’umupira w’amaguru batekereza igikorwa cyiza cyo gufasha no gufata mu mugongo abasizwe iheruheru na Jenoside.

KANDA HANO UREBE VIDEOS UTASANGA AHANDI