Ikipe ya Etincelles yabereye ibamba Rayon Sports iyigabanyiriza amahirwe y’igikombe

Chief Editor | 25-05-2016
Ikipe ya Etincelles yabereye ibamba Rayon Sports iyigabanyiriza amahirwe y’igikombe

Kuri uyu wa Gatatu tariki 25 Gicurasi 2016, nibwo habaye umukino wa shampiyona w’ikirarane wagombaga guhuza Rayon Sports na Etincelles, iyi kipe yo mu karere ka Rubavu ikaba yabereye ibamba Rayon Sports inayigabanyiriza amahirwe yo kwegukana igikombe cya shampiyona.

Ikipe ya Rayon Sports iri ku mwanya wa kabiri ku rutonde rwa shampiyona, ishishikajwe no kwegukana igikombe bityo ikaba yashakaga kwitwara neza muri uyu mukino, nyamara Etincelles nayo irimo kurwanira kutajya mu murongo w’ikipe zifite ibyago byo kumanuka mu cyiciro cya kabiri, yihagazeho zigabana amanota.

Igice cya mbere cy’uyu mukino wabereye kuri Sitade ya Kigali i Nyamirambo, cyarangiye Rayon Sports ifite igitego kimwe ku busa cyatsinzwe na Nshuti Dominique Savio, ariko mu gice cya kabiri Etincelles yabashije kwishyura umukino urangira ari 1-1.

Kunganya na Etincelles byongeye gutera impungenge abakunzi ba Rayon Sports no kugabanya amahirwe yo gutwara igikombe, intera y’amanota iyi kipe irushwa na APR FC ya mbere ikaba ikomeye kuba nini kuko ubu igize amanota 54 mu gihe APR FC ya mbere ifite amanota 58.

KANDA HANO UREBE VIDEOS UTASANGA AHANDI