Ikipe ya Rayon Sports yatsinzwe na AS Muhanga, APR ihita ihabwa igikombe

Chief Editor | 7-07-2016
Ikipe ya Rayon Sports yatsinzwe na AS Muhanga, APR ihita ihabwa igikombe

Kuri uyu wa Kane ikipe ya Rayon Sports yatsinzwe umukino yakinnye na AS Muhanga, bituma icyizere cyo kwegukana igikombe cya shampiyona y’uyu mwaka gikendera cyose, ndetse APR FC ihita itwara igikombe cya shampiyona.

Rayon Sports yatsindiwe i Muhanga igitego 1-0, iki gitego rukumbi kikaba cyatsinzwe na Jean Bosco Akayezu ku munota wa 57 w’umukino, mu gihe Davis Kasirye na Kwizera Pierrot ba Rayon Sports, mu gice cya mbere cy’umukino babonye penaliti bakananirwa kuzinjiza.

Gutakaza amanota kwa Rayon Sports, byari bihagije ngo bihite bihesha APR FC igikombe cya shampiyona. APR FC irarusha Rayon Sports amanota 10 kandi iracyafite undi mukino, mu gihe Rayon Sports isigaranye imikino ibiri, inayitsinze yombi ikaba yasigara irushwa na APR FC amanota 4.

N’ubwo ntacyo bizahindura kuri shampiyona, ku Cyumweru Rayon Sports izakina na Kiyovu Sports byo kurangiza umuhango, hanyuma umukino wayo wa nyuma ikazakina na Espoir FC y’i Rusizi.

APR FC yamaze guhabwa igikombe cyayo, isigaje umukino uzayihuza na AS Kigali tariki 16 Nyakanga 2016, kuri sitade ya Kigali i Nyamirambo.

KANDA HANO UREBE VIDEOS UTASANGA AHANDI