Imbere y’umucamanza, Messi yireguye avuga ko yagiye asinyira ibintu nawe atazi

Chief Editor | 3-06-2016
Imbere y’umucamanza, Messi yireguye avuga ko yagiye asinyira ibintu nawe atazi

Kuri uyu wa Kane tariki 2 Kamena 2016, nibwo Lionel Messi yagejejwe imbere y’urukiko rukuru mu gihugu cya Esipanye aho rumaze iminsi rutangiye kuburanisha urubanza ruregwamo iki gihangange mu mupira w’amaguru Lionel Messi, aho ashinjwa ibyaha byo kunyereza amamiliyoni y’imisoro. Imbere y’umucamanza, Messi yavuze ko yasinyiye ibintu atazi

Uyu rutahizamu ukomoka mu gihugu cya Argentine akaba anakinira ikipe ya FC Barcelona yo muri Esipanye, ashinjwa kurigisa amamiliyoni menshi y’imisoro, kuva mu mwaka wa 2007 kugeza muri 2009 akaba avugwaho kurigisa amadolari asaga 4.500.000, ni ukuvuga arenga 3.577.500.000 uyabaze mu mafaranga y’u Rwanda.

Messi yareganywe na Se umubyara witwa Jorge ari nawe ushinzwe gucunga no gukurikirana imitungo y’umuhungu we, bakaba banashinjwa kubeshya abakozi bashinzwe gukusanya imisoro ya Leta ubwo babazwaga ngo haboneke amakuru yagombaga gufasha mu iperereza.

N’ubwo Messi n’umubyeyi we Jorge bakomeje guhakana ibyaha byose baregwa, uruhande rw’ubushinjacyaha rwo rusaba ko uretse gucibwa ihazabu y’amafaranga menshi, bakwiye no gufungwa kugirango babere urugero n’abandi bafite umutima wo kunyereza imisoro. Biteganyijwe ko uru rubanza rugomba kumara iminsi itatu.

Ubwo yageraga imbere y’umucamanza kuri uyu wa Kane, Messi yavuze ko yagiye asinyira ibintu atabanje gusoma kubera ko yizeraga Se umubyara kandi n’abakozi bashinzwe ibyo gukurikirana imitungo ye akaba yarabizeraga.

Messi yavuze ko icyari kimushishikaje ari ugukina umupira, gusa akaba azi ko bagiye basinya akasezerano menshi ariko yose akaba we yarashyiragaho umukono atabanje gusoma no gusesengura ibyanditse muri ayo masezerano.

KANDA HANO UREBE VIDEOS UTASANGA AHANDI