Lionel Messi yahagaritse burundu gukinira ikipe y’igihugu cye yari abereye kapiteni

Chief Editor | 27-06-2016
Lionel Messi yahagaritse burundu gukinira ikipe y’igihugu cye yari abereye kapiteni

Ikirangirire mu mupira w’amaguru, rutahizamu w’ikipe ya FC Barcelona akaba yari na kapiteni w’ikipe y’igihugu cye cya Argentine wamamaye nka Lionel Messi, yamaze gutangaza ko ahagaritse burundu gukinira ikipe y’igihugu cye, ibi bikaba bibaye nyuma yo kubura igikombe cya Copa Amerika.

Umukino wa nyuma w’igikombe cya Copa Amerika, wahuje Argentine na Chili mu gicuku cyo ku Cyumweru gishyira kuri uyu wa Mbere, urangira mu rukerera Chili itwaye igikombe nyuma yo gutsinda Argentine kuri penaliti, Lionel Messi akaba ari mu bahushije penaliti ku ruhande rw’ikipe ye, bituma ibura igikombe.

Nyuma y’uyu mukino, Lionel Messi yahise afata icyemezo ntakuka cyo kutazongera gukinira ikipe y’igihugu akomokamo, n’ubwo akiri muto kuko afite imyaka 29 gusa y’amavuko. Messi ati: "Kuri njyewe, byarangiye sinzongera gukinira ikipe y’igihugu cyanjye. Nakoze ibyo nari nshoboye byose, ariko birababaza kudatwara igikombe."

Hamwe n’ikipe ya FC Barcelona, Messi yatwaye ibikombe bya shampiyona yo muri Espagne (Spain) bigera ku 8 anatwara ibya UEFA Champions League 4 hamwe n’ibindi bitandukanye, ariko mu ikipe ye ya Argentine uretse umudari wa zahabu bakuye mu mikino ya Olympic ya 2008, nta gikombe aratwaramo n’ubwo amaze kugeza iyi kipe ku mukino wa nyuma inshuro nyinshi bahatanira igikombe gikomeye.

Muri 2004, Argentine yatsinzwe n’u Budage ku mukino wa nyuma w’igikombe cy’isi igitego 1-0, muri 2015 batsindwa kuri penaliti na Chili ku mukino wa nyuma wa Copa Amerika, ndetse ibi bikaba byisubiyemo muri uyu mwaka wa 2016. Muri 2007 nabwo, batsinzwe na Brazil ku mukino wa nyuma wa Copa Amerika.

KANDA HANO UREBE VIDEOS UTASANGA AHANDI