Lionel Messi yisubiyeho, abakunzi be babyinira ku rukoma

Rukundo Irené | 13-08-2016
Lionel Messi yisubiyeho, abakunzi be babyinira ku rukoma

Nyuma yo gutsindirwa ku mukino wa nyuma wo guhatanira igikombe cya Copa America batsinzwe n’ikipe ya Chile itaborohera na gato dore ko imaze kubatsinda ubugira kabiri mu mikino ibiri yose bahuye bahatanira igikombe, rutahizamu w’ikipe ya Argentine Lionel Messi yahise atangaza ko asezeye mu ikipe y’igihugu. Iki gitekerezo ntiyakimaranye igihe kirekire kuko kuri uyu wa Gatanu yatangaje ko agiye kugaruka gukinira ikipe ye ndetse ko atapfa gusiga ikipe y’igihugu cyamubyaye.

Lionel Messi usanzwe akinira ikipe ya Barcelona, mu kwezi kwa Kamena nibwo yatangaje ko asezeye mu ikipe y’igihugu, ubwo bakinaga n’ikipe y’igihugu ya Chile ikabatwara igikombe cya Copa America. Icyo gihe byari amarira menshi kuri uyu mugabo w’imyaka 29, kuko si byari ugutsindwa gusa, ahubwo yaje gutera penaliti ayita hejuru cyane maze amahirwe yo gutwara igikombe arayoyoka. Umukino ukirangira yatangarije abanyamakuru ko yagerageje ibishoboka byose ariko bikaza kwanga, ndetse yongeraho ko kutaba uwa mbere (Champion) bibabaza cyane ari nabwo yavuze ko ariwo mukino wanyuma yari akiniye ikipe ye.

Kugeza ubu ngubu ibi siko bikiri kuko uyu mukinnyi w’icyamamare kuri uyu wa Gatanu yatangaje ko bitoroha kuba wasiga ikipe y’igihugu cyawe kandi hari byinshi ushobora kuyifasha, kandi ngo burya ntabwo wafasha ikipe utayirimo.

Yagize ati: "Ndakeka ko mu ikipe y’umupira w’amaguru ya Argentine harimo ibibazo byinshi bigomba gukemuka, rero sinjye ugomba kwiyongeraho nkazana ibibazo birenze ibihari, ahubwo icy’ingenzi ni uko nagaruka mu ikipe nkayifasha nyirimo imbere nkareka kugenda ngo nicare hanze yayo ubundi ntangire nyinenga. Umunsi dutsindwa na Chile numvise mu mutwe wanjye huzuyemo ibibazo byinshi ari nabyo byanteye kuvuga ko nsezeye mu ikipe yanjye ariko mu by’ukuri nkunda igihugu cyanjye kandi uyu mwambaro wayo urakomeye kuri njye.”

Biteganyijwe ko Lionel Messi azaboneka ku rutonde rw’abakinnyi ikipe ya Aregenine izakinisha ubwo bazaba bahatanira itike yo kuzajya mu gikombe cy’isi cya 2018 ubwo bazaba bahatanye na Uruguay ndetse na Venezuela.

Ikipe ya Argentine ntabwo yagiye ayigiriramo amahirwe

Kuba yarahushije penaliti ku mukino wa nyuma bakina n’ikipe ya Chile, ntabwo ariyo mahirwe Lionel Messi yabuze yonyine kuko amaze kugera ku mikino yanyuma inshuro enye zose nta na rimwe aragira amahirwe yo gutwara igikombe. Muri izi nshuro zose harimo n’inshuro imwe ikipe ye yageze ku mukino wa nyuma w’igikombe cy’isi cya 2014 ubwo bahuraga n’ikipe y’igihugu y’Abadage ikabatsinda.

Nyamara n’ubwo bigaragara ko amahirwe ya Lionel Messi akiri macye mu gutwarira ibikombe mu ikipe y’igihugu, Perezida wa Argentine Maurcio Marci yamusabye kongera kugaruka mu ikipe y’igihugu agakomeza kuyikinira kuko we abona ko ari impano bafite ikomeye. Yagize ati: ”Ni impano y’Imana kugira umukinnyi mwiza ku isi hose mu gihugu cyacu. Messi ni cyo kintu cy’agaciro dufite muri Argentine kandi tugomba gukomeza kumwitaho bishoboka.” Ibingibi Maurcio yabitangaje igihe Messi yavugaga ko asezeye mu ikipe y’igihugu.

KANDA HANO UREBE VIDEOS UTASANGA AHANDI