Man City, Man United, Real Madrid na FC Barcelona ntizahiriwe n’impera z’icyumweru

Parfait Mutabazi | 3-10-2016
Man City, Man United, Real Madrid na FC Barcelona ntizahiriwe n’impera z’icyumweru

Shampiyona yo mu gihugu cy’u Bwongereza kuri iki Cyumweru yari yakomeje maze amakipe akomeye yahabwaga amahirwe yo gutsinda atakaza amanota ari nako agenda ava ku myamya y’imbere ku rutonde rw’agateganyo, cyane cyane ariko ikipe yakomeje kwibazwaho byinshi ni Manchester United kuko kubona amanota atatu bisigaye bigoye, nyamara iyi kipe yaratanze akayabo k’amafaranga igura abakinnyi.

Umukino wa Manchester United ni wo wabimburiye iyindi aho yakiraga Stoke City. Ni umukino Manchester United yakinaga neza ariko kureba mu izamu bikanga, bitewe n’uko ba myugariro ba Stoke City bari bahagaze neza. Kubera igitutu cyo gushaka intsinzi cyane, abakinnyi ba Manchester United nka Zlatan Ibrahmovic, baje kubona amakarita y’imihondo mu gice cya kabiri naho Antonio Valencia yari yabonye ikarita y’umuhondo hakiri kare ku munota wa 13 gusa. Mu gice cya kabiri Jose Felix Mourinho yaje gukora impinduka avanamo Lingard ashyiramo Antoni Martial waje gutsinda igitego ku munota wa 69 maze Manchester United itangira gukina nk’iyizeye intsinzi nyamara Stoke City ntiyaje kuyorohera kuko yaje kwishyura ku munota wa 82 maze umukino urangira gutyo amakipe yombi anganya.

Undi mukino wahuje Manchester City na Tottenham, iyi kipe itozwa na Pep Guardiola ikaba yari imaze imikino 6 ya shampiyona itaratsindwa bikaba byari byitezwe ko n’ubundi ibyitwaramo neza, nyamara ibyo abantu bari bategereje sibyo byabaye kuko iyi kipe iyoboye izindi ku rutonde yatsinzwe ibitego 2 ku busa. Igitego cya mbere Manchester City yagitsinzwe n’umukinnyi wayo Koralov ku munota wa 9 gusa, icyakabiri kijyamo ku munota wa 37 gitsinzwe na Eric Lamela.

Mu yindi mikino yabaye mu Bwongereza, Liecester yanganyine na Southampton, Arsenal itsindira Burnley ku kibuga cyayo bigoranye kuko yayitsinze igitego kimwe ku busa. Manchester City iracyayoboye urutonde n’amanota 18, Tottenham ni iya kabiri n’amanota 17, Arsenal ni iya gatatu n’amanota 16, Liverpool iza ku mwanya wa kane n’amanota 16, iya gatanu ni Everton n’amanota 14, Manchester United ikaza ku mwanya wa gatandatu n’amanota 13, ikanganya amanota na Chelsea iza ku mwanya wa 7. Ikipe ya Liecester ifite igikombe cya shampiyona y’umwaka ushize, yo iza ku mwanya wa 12 n’amanota 8.

KANDA HANO UREBE VIDEOS UTASANGA AHANDI