Man United ya Mourinho, Pogba na Zlatan Ibrahimovic yahawe isomo na Man City

Chief Editor | 10-09-2016
Man United ya Mourinho, Pogba na Zlatan Ibrahimovic yahawe isomo na Man City

Ikipe ya Manchester United itozwa n’umutoza Jose Mourinho ikaba inafite abakinnyi b’ibihangange nka Paul Pogba uherutse guca agahigo ko kugurwa akayabo ndetse n’icyamamare Zlatan Ibrahimovic, yihanijwe na Manchester City itozwa na Pep Guardiola, babatsindira ku kibuga cyabo.

Umukino wo ku munsi wa 4 wa shampiyona y’igihugu cy’u Bwongereza, wahuje amakipe abiri yo mu mujyi wa Manchester, ayo akaba ari Manchester United yari yakiriye Manchester City, amakipe akomeye kandi asanzwe ahangana bikomeye muri iki gihugu.

Ikipe ya Manchester City niyo yafunguye amazamu ku munota wa 15 w’umukino, ibona igitego cyatsinzwe na Kevin de Bruyne. Ku munota wa 36 Manchester City yaje kubona igitego cyayo cya kabiri gitsinzwe na Kelechi Iheanacho, abafana ba Manchester United batangira kubona ko bashobora gutsindwa uyu mukino.

Ku munota wa 42 w’umukino, Zlatan Ibrahimovic yabonye igitego cya mbere cya Manchester United, igice cya mbere cy’umukino kirangira ari 2-1 ndetse no mu gice cya kabiri habura ikipe yongera gutsinda igitego umukino urangira utyo.

Zlatan Ibrahimovic, n’ubwo ikipe ye yatsinzwe yaciye agahigo ko kuba yiyongereye ku bakinnyi babashije kubona ibitego 4 mu mikino 4 itangira shampiyona y’igihugu cy’u Bwongereza.

KANDA HANO UREBE VIDEOS UTASANGA AHANDI