Nyuma ya Rugimbana na Rutamu bagiye, ugezweho kwimuka ni Rugangura Axel

Chief Editor | 3-06-2016
Nyuma ya Rugimbana na Rutamu bagiye, ugezweho kwimuka ni Rugangura Axel

Mu gihe guhera tariki 10 Kamena 2016 abanyamakuru Rugimbana Théogène na Rutamu Elie Joe bazatangira gukora kuri Radio One, mugenzi wabo Rugangura Axel niwe ushobora guhita asimbura Rutamu aho yakoraga.

Mu minsi ishize nibwo Ikinyamakuru Ukwezi.com cyabagejejeho inkuru ivuga ko Rugimbana na Rutamu bavuye ku bitangazamakuru bakoreraga bagahuriza imbaraga kuri Radio One, ibintu bamwe babanje gufata nk’ibihuha ariko bakaza kubona ko ari impamo. Nyuma y’aba babiri, ubu ugezweho ni Rugangura Axel.

Rugangura Axel, Rutamu Elie Joe na Rugimbana Théogène, bose bamamariye kuri Radio Flash FM aho bamenyereweho umwihariko mu kogeza imikino y’umupira w’amaguru. Nyuma yo kumenyekanira kuri iyi radiyo, babiri baje kuhava bajya gukorera izindi Radio.

Rutamu yabanje kujya ku Isango Star nyuma aza kujya kuri Radio Rwanda ari naho yari ari kugeza ubu, mu gihe Rugimbana we yakoreraga Radio 10, ariko bombi ubu bagiye gukorera Radio One, mu gihe igenda rya Rutamu wavuye kuri Radio Rwanda, hari amakuru agera ku kinyamakuru Ukwezi.com ashimangira ko rigiye gutuma asimburwa na Rugangura Axel.

Rugangura Axel, amaze igihe aganira n’abayobozi b’ikigo cy’igihugu cy’itangazamakuru (RBA) abo bavuganaga ku mushahara bagomba kumuha byumvikana ko ugomba kuba uruta uwo yabonaga kuri Flash FM, kandi ibiganiro bigeze kure kuburyo ashobora gusimbura Rutamu vuba bidatinze.

KANDA HANO UREBE VIDEOS UTASANGA AHANDI