Portugal itarahabwaga amahirwe yageze ku mukino wa nyuma, Cristiano aca utundi duhigo

Chief Editor | 6-07-2016
Portugal itarahabwaga amahirwe yageze ku mukino wa nyuma, Cristiano aca utundi duhigo

Umukino wa 1/2 w’amarushanwa y’umupira w’amaguru ya Euro 2016 wabaye mu ijoro ryo kuri uyu wa Gatatu tariki 6 Nyakanga 2016, warangiye ikipe ya Portugal ibashije gutsinda ihita igera ku mukino wa nyuma, mu gihe Kapiteni wayo Cristiano Ronaldo yongeye guca agahigo.

Kuva amarushanwa ya Euro 2016 yatangira, ikipe y’igihugu cya Portugal yari itarabasha gutsinda umukino n’umwe mu minota 90 isanzwe y’umukino, kuko imikino itatu yose yo mu matsinda bayinganyije naho umukino wa 1/8 n’uwa 1/8 ikaba yarayitsinze nyuma yo kunganya hakitabazwa n’indi minota y’inyongera. Iyi kipe ariko, inafite agahigo ko kuba yageze ku mukino wa nyuma itaratsindwa umukino n’umwe, nyuma yo gutsinda Wales ibitego 2-0. Igitego cya mbere cyatsinzwe na Cristiano Ronaldo ku munota wa 50, icya kabiri gitsindwa na Nani ku munota wa 53.

Muri aya marushanwa, Cristiano Ronaldo amaze guca uduhigo dutanu, harimo n’ako yaciye muri uyu mukino. Afite agahigo ko gutsinda ibitego mu marushanwa ane akurikirana y’igikombe cy’u Burayi, dore ko yatsinze mu ya 2004, 2008, 2012 n’aya marushanwa ya 2016. Agahigo ka kabiri Cristiano Ronaldo yaciye, ni ako kuba umukinnyi wa mbere mu mateka watsinze ibitego byinshi mu marushanwa y’igikombe cy’u Burayi ubariyemo n’imikino y’amajonjora, aho amaze gutsinda ibitego 27.

Yanaciye agahigo kandi ko kuba ari we mukinnyi ugikina umupira w’amaguru ufite ibitego byinshi mu mikino ya nyuma y’aya marushanwa, kuko yujuje ibitego 9 akaba anganya na Michel Platini utagikina ariko wari waratsinze byinshi kurusha abandi mu mateka yose y’iri rushanwa, ubu Cristiano akaba yamaze kumushyikira kandi we agikina kuburyo ashobora no kubona ikindi ku mukino wa nyuma.

Akandi gahigo, ni ako kuba ari we mukinnyi wa mbere ubashije gutsinda ibitego byibuze bitatu mu marushanwa abiri ya Euro akurikirana, kuko yabikoze muri 2012 n’ubu muri 2016 akaba yongeye kubikora.

Gukina uyu mukino ariko byonyine, ni agahigo Cristiano Ronaldo ashimangiye ko kuba umukinnyi wa mbere ubashije gukina imikino ya nyuma myinshi y’igikombe cy’u Burayi, kuko uyu mukino ari uwa 20 mu gihe abari basanzwe barakinnye myinshi ari Lilian Thuram wahoze ari myugariro w’u Bufaransa na Edwin van der Sar wari umuzamu w’u Buholandi, bombi babashije gukina imikino 16. Cristiano kandi aracyari mu marushanwa kuko igihugu cye cyakomeje ku mukino wa nyuma uzayihuza n’izatsinda hagati y’u Bufaransa n’u Budage.

KANDA HANO UREBE VIDEOS UTASANGA AHANDI