Rayon Sports yanyagiye Bugesera FC, ikomeza kotsa igitutu mukeba wayo APR FC

Chief Editor | 11-05-2016
Rayon Sports yanyagiye Bugesera FC, ikomeza kotsa igitutu mukeba wayo APR FC

Ibifashijwemo ba ba rutahizamu barangajwe imbere na Ismaila Diarra wigaragaje cyane ndetse na Kwizera Pierrot, ikipe ya Rayon Sports yongeye gushimangira ko ishaka kwegukana igikombe byanze bikunze, inyagira ikipe ya Bugesera FC ibitego 4 byose ku busa.

Uyu mukino wa 23 wa shampiyona y’igihugu y’umupira w’amaguru, wabereye kuri Sitade ya Kigali bakunda kwira Regional iherereye i Nyamirambo mu mujyi wa Kigali. Ikipe ya Rayon Sports yongeye gushimangira ko ihagaze neza cyane cyane mu busatirizi, dore ko imaze igihe itsinda kandi ibasha no kubona ibitego byinshi mu mukino.

Ku munota wa 8 gusa w’umukino, Ismaila Diarra yafunguye amazamu, igitego cya mbere kiba kiranyoye. Bidatinze ku munota wa 32, Kwizera Pierrot yaje kubona igitego cya kabiri cya Rayon Sports, abafana b’iyi kipe bakunda kwita Gikundiro batangira kuririmba intsinzi.

Ibi ntibyarangiriye aha kuko ku munota wa 35 w’umukino Ismaila Diarra yaje n’ubundi gutsinda igitego cya gatatu cya Rayon Sports, kiba kibaye igitego cye cya kabiri mu mukino. Igice cya mbere cy’umukino cyarangiye ari ibitego 3-0.

Mu gice cya kabiri cy’umukino, n’ubwo hatabonetsemo ibitego byinshi, Rayon Sports yakomeje guhererekanya neza no kugaragaza ko irusha cyane ikipe ya Bugesera FC, maze ku munota wa 72 w’umukino, Ismaila Diarra n’ubundi abyaza umusaruro umupira mwiza yari ahawe na Nshuti Dominique Savio, biba bibaye ibitego 4-0, uyu rutahizamu nawe aba yujuje ibitego bye bitatu muri uyu mukino.

Iyi ntsinzi ya Rayon Sports, yayifashije kurushaho kotsa igitutu ikipe ya APR FC bigaragara ko bahanganiye igikombe, ubu APR FC ikaba ifite amanota 52 mu gihe Rayon Sports ya kabiri ifite amanota 51, gusa Rayon Sports ikaba izigamye ibitego byinshi kuburyo mu gihe APR FC yakora ikosa igatsindwa cyangwa ikanganya, byayigora kuzakura igikombe mu nzara za Rayon Sports.

Mu yindi mikino yabaye kuri uyu wa Gatatu, ikipe ya Mukura Vs yabashije gutsindira Kiyovu Sports i Kigali, Police FC itsinda AS Muhanga ibitego 2-0, nayo Etincelles yari yakiriye Espoir FC ibasha kubyitwaramo neza iyitsinda 1-0

KANDA HANO UREBE VIDEOS UTASANGA AHANDI