Samuel Eto’o yinjiye mu ntambara y’amagambo hagati ya Cristiano Ronaldo na Xavi Hernandez

Rukundo Irené | 16-09-2016
Samuel Eto’o yinjiye mu ntambara y’amagambo hagati ya Cristiano Ronaldo na Xavi Hernandez

Mu cyumweru gishize nibwo Xavi Hernandez na Cristiano Ronaldo bateranye amagambo mu itangazamakuru ubwo Xavi yavugaga ko abona Cristiano Ronaldo nk’udakwiriye kuba yaba umukinnyi w’isi ndetse ko adakwiye no kuba yagereranywa na Messi. Ibi ntibyarangiriye aho kuko na Ronaldo yaje asubiza Xavi ko nawe atazigera atwara igihembo cya Ballon d’Or na rimwe mu buzima bwe. Iyi ntambara ubu yinjiwemo na Samuel Eto’o Fils wagaragaje ko ibyo Xavi yavuze ari byo, kuko nawe atabona Ronaldo nk’umukinnyi mwiza uruta abandi.

Samuel Eto’o Fils wigeze kuba rutahizamu ukomeye mu ikipe ya FC Barcelona, yavuze ko impamvu Xavi nawe wahoze akinira ikipe ya Barcelona atigeze atwara igihembo cya Ballon d’Or ari ukubera ko mu kugitanga habamo ukubogama cyane, ashimangira ko Xavi ari umukinnyi mwiza ukwiye guhabwa icyubahiro gikomeye.

Eto’o yababajwe n’amagambo Christiano yasubije Xavi maze nawe avuga ko Xavi yagakwiye kuba amaze gutwara Ballon d’Or inshuro nyinshi. Ibi yabivuze ubwo yaganiraga n’ikinyamakuru El Larguero, akaba yagize ati: "Iyo Ballon d’Or iza kuba igihembo gitangwa kuburyo bunoze, Xavi aba yaragitwaye inshuro zigera kuri eshanu cyangwa esheshatu zose, Xavi akwiye icyubahiro.”

Intandaro yo guterana amagambo hagati ya Cristiano Ronaldo na Xavi Hernandez, yabaye ikiganiro uyu Xabi yagiranye n’igitangazamakuru cyitwa Cadena SER cyo muri Esipanye, icyo gihe akaba ari bwo yibasiye Ronaldo avuga ko ari umukinnyi mwiza ariko utakagombye kuba umukinnyi wa mbere mwiza mu mateka y’umupira w’amaguru ndetse avuga ko Messi ari we mukinnyi mwiza, ko adakwiye kugereranywa na Ronaldo.

Yavuze ko usibye abafana b’ikipe ya Real Madrid, nta wundi muntu utazi ko Lionel Messi arusha ubuhanga Ronaldo. Yagize ati: ”Ronaldo ni umukinnyi mwiza mu gihe cye, ariko ikibazo ni uko hari undi wabaye mwiza ibihe byose mu mateka. Ronaldo afite ubuhanga ariko ku bwanjye ndetse na buri wese arabibona, Messi ni umukinnyi utakwirirwa ugereranya na Ronaldo. Messi azaba uwa mbere kugeza igihe abishakiye kandi ni umuhanga kuri buri wese usibye umuntu ukunda Real Madrid wenyine.”

Ronaldo utajya wiburira nawe ntabwo yatereye agati mu ryinyo, ahubwo yagize ibyo asubiza Xavi kuko ibyo yumvise bitamunejeje, maze amusubiza agira ati: "Buri wese arabizi ko umuntu wese ushaka kugira ikintu agaragaza, ari njyewe abanza ku rupapuro rubanza. Xavi ntabwo yigeze atsindira Ballon d’Or kandi nta n’iyo azigera atsindira, ariko njyewe natwaye eshatu zose.”

KANDA HANO UREBE VIDEOS UTASANGA AHANDI