Sinirata kandi sindi n’umuntu mubi nk’uko babivuga - Zlatan Ibrahimovic.

Munyemana Emmanuel | 13-08-2016
Sinirata kandi sindi n’umuntu mubi nk’uko babivuga - Zlatan Ibrahimovic.

Umukinnyi rurangiranwa Zlatan Ibrahimovic ukomoka mu gihugu cya Swede, yatangaje ko abantu bamwumvise nabi kuko ngo atari umwirasi cyangwa umuntu mubi nk’uko bikunze gutangazwa.

Ubwo yaganiraga n’ikinyamakuru cyo mu bwongereza Skysports, Zlatan Ibrahimovic yavuze ko ari umuntu usanzwe kandi ukunda gukora cyane bitandukanye n’uko benshi babikeka. Yagize ati: "Sinirata yewe nta n’ubwo ndi umuntu mubi ahubwo banyumva nabi."

Uyu rutahizamu w’imyaka 34 ukinira ikipe ya Manchester United yo mu Bwongereza, ntiyemeranya kandi n’abamufata mu buryo butandukanye n’uko ari, dore ko nk’uko abyivugira ku ruhande rumwe ari umugabo ukomoka mu muryango kandi wita ku muryango we uko bishoboka kose gusa ngo iyo bigeze mu kibuga ahinduka intare.

Yakomeje yemeza ko atirata mu buryo abantu babifata ko ahubwo yiyumva nk’umuntu wiyizera kandi akabikora nk’ikiremwa muntu. Aha yagize ati: "Sinirata mu buryo abantu babifata, njye ndiyizera ubwanjye kandi mbikora nk’ikiremwa muntu."

Ibrahimovic wamaze kuba umukinyi wa Manchester United, yahamirije iki kinyamakuru ko we yiyizera nk’umuntu ufite imbere heza, ukora ibishoboka kandi akabigeraho; gusa ngo ntazi niba ibyo ari ukwirata.

Gusa ibi abitangaje mu gihe yagiye yumvikanaho ubwishongozi bwinshi mu binyamakuru. Igihe kimwe yagize ati:"Igikombe cy’isi ntarimo ntacyo cyaba kivuze", ubundi ati: "Ndi imana mu Bwongereza."

Abitangaje kandi mbere y’uko ikipe ye ya Manchester United ikina umukino wayo wa mbere wa shampiona y’u Bwongereza, uyu mukino ukazaba kuri iki Cyumweru aho ugomba kuyihuza n’ikipe ya Bournemouth. Manchester United kandi ikaba iherutse kwegukana igikombe cya Community Shield nyuma yo gutsinda bigoranye ikipe ya Leicester City ibitego 2-1, muri ibyo bitego Zlatan Ibrahimovic akaba yaratsinzemo igitego cyahesheje insinzi Manchester.

Uyu mukinnyi rurangiranwa uherutse kugurwa n’umutoza Jose Mourinho amukuye muri Paris Saint Germain yari yaraciye mu makipe atandukanye harimo Ajax, Juventus, Inter Milan, Barcelona na A.C. Milan.

KANDA HANO UREBE VIDEOS UTASANGA AHANDI