Ukurusha ifaranga akurusha ijambo, APR FC yambuye Rayon Sports umukinnyi ukomeye

Chief Editor | 14-07-2016
Ukurusha ifaranga akurusha ijambo, APR FC yambuye Rayon Sports umukinnyi ukomeye

Imanishimwe Emmanuel, umwe mu basore ikipe ya Rayon Sports yari yubakiyeho, yamaze gusinya amasezerano mu ikipe ya APR FC, nyuma y’amasaha macye Rayon Sports yemeje ko bamaze kumwongerera amasezerano, ubwinshi bw’amafaranga ya APR FC bukaba burikoreye abakunzi ba Rayon.

Imanishimwe Emmanuel, yari yamaze kwemeranywa na Rayon Sports ko azayikinira indi myaka ibiri, ndetse bemeranywa miliyoni enye z’amafaranga y’u Rwanda, ku ruhande rw’ubuyobozi bwa Rayon Sports, Gakwaya Olivier akaba yanashyize hanze amafoto barimo gusinya amasezerano.

Nyuma y’amasaha macye ariko, hamenyekanye amakuru y’uko APR FC yamukubiye kabiri, ikamuha miliyoni umunani (8) z’amafaranga y’u Rwanda nawe agahita abyemera atazuyaje, nabo akaba yabasinyiye amasezerano y’imyaka ibiri.

Umunyamabanga mukuru wa Rayon Sports, Gakwaya Olivier, yatangarije ikinyamakuru Ukwezi.com ko ubuyobozi bw’iyi kipe bwamaze kumenya amakuru y’uko APR FC yamaze gusinyisha uyu mukinnyi, bakaba bagomba kwitabaza amategeko kuko bitemewe kuba yasinya amasezerano mu makipe abiri, ikindi kandi bakaba bamusinyishije akiri umukinnyi wa Rayon Sports kuko amasezerano ya mbere yari kuzarangira ku Cyumweru ubwo hazaba hasozwa shampiyona.

KANDA HANO UREBE VIDEOS UTASANGA AHANDI