Umufaransa yahembwe nk’umukinnyi witwaye neza kurusha abandi muri Euro 2016

Chief Editor | 11-07-2016
Umufaransa yahembwe nk’umukinnyi witwaye neza kurusha abandi muri Euro 2016

Umukinnyi w’ikipe y’igihugu y’u Bufaransa usanzwe akinira ikipe ya Atletico Madrid yo muri Esipanye witwa Antoine Griezmann, niwe wahawe igihembo cy’umukinnyi witwaye neza kurusha abandi mu irushanwa ry’igikombe cy’u Burayi, Euro 2016.

Uyu Antoine Griezmann wabashije gutsinda ibitego 6 mu iri rushanwa akaba ari nawe mukinnyi wabashije kwinjiza byinshi, n’ubwo ikipe ye yabuze igikombe nyuma yo gutsindwa na Portugal ku mukino wa nyuma 1-0, niwe watowe nk’umukinnyi witwaye neza kurusha abandi.

Ishyirahamwe ry’umupira w’amaguru ku mugabane w’u Burayi, ryemeje ko uyu rutahizamu w’imyaka 25 ari we watowe n’itsinda ry’inzobere rigizwe n’abantu 13 barimo na Sir Alex Ferguson na David Moyes.

Antoine Griezmann kandi yanashyizwe mu ikipe y’irushanwa yatoranyijwe mu makipe y’ibihugu byose byitabiriye iri rushanwa, gutsinda ibitego byinshi ubwabyo bikaba byari byanamuhesheje kubona urukweto rwa zahabu (Golden boot).

Ku rundi ruhande, umukinnyi wo hagati mu ikipe ya Portugal witwa Renato Sanches niwe wabaye umukinnyi ukiri muto mwiza kurusha abandi bose bakinnye irushanwa rya Euro 2016, uyu mwana w’imyaka 18 akaba akinira ikipe ya Bayern Munich yo mu Budage, akaba yarakoze akazi gakomeye afasha igihugu cye gutwara igikombe cya Euro 2016.

KANDA HANO UREBE VIDEOS UTASANGA AHANDI