AMAKURU

UKWEZI

Urujijo n’amayobera ku yindi sura MINISPOC yahaye ibyavuzwe na Minisitiri Uwacu Julienne

Urujijo n’amayobera ku yindi sura MINISPOC yahaye ibyavuzwe na Minisitiri Uwacu Julienne
16-06-2016 | By Chief Editor | Yasomwe n'abantu 4954 | Ibitekerezo 4

Nyuma y’uko Minisitiri w’umuco na Siporo, Uwacu Julienne atangaje ko abatoza b’abanyarwanda hari urwego batarageraho kuburyo batoza Amavubi, byakuruye impaka ndende binababaza benshi cyane cyane abatoza, bituma Minisiteri ishimangira ko habayeho kubifata uko bitari ariko n’ubundi biteza urujijo kuko ibyo ivuga ntaho bitaniye n’ibyatangajwe mu binyamakuru binyuranye.

Kuwa Kabiri tariki 14 Kamena 2016, nibwo Abadepite bagize Komisiyo y’Ingengo y’Imari n’Umutungo by’Igihugu bakiriye Minisitiri w’Umuco na Siporo, Uwacu Julienne ngo asobanure uko Minisiteri ayobora izakoresha ingengo y’imari ya 2016/2017, maze anabazwa ku kibazo cy’umusaruro w’ikipe y’igihugu y’umupira w’amaguru.

Umwe mu badepite yabajije Minisitiri Uwacu Julienne impamvu ikipe y’igihugu idatozwa n’umunyarwanda ahubwo igatozwa n’abanyamahanga batwara igihugu amafaranga menshi ariko ntihagire umusaruro muzima batanga, maze Minisitiri Uwacu avuga ko abanyarwanda hari urwego batarageraho.

Yagize ati : "Amakipe yacu kuba adatanga umusaruro nk’uko tubikeneye, nibyo bishobora kuba bifite impamvu zitari izishingiye ku bakinnyi cyangwa ku batoza gusa, zinajyanye n’aho duturutse mu bijyanye no guteza imbere siporo. Kuba rero twarafashe umwanzuro muri politiki yacu ko dukwiye kubaka siporo ishingiye ku Banyarwanda, ni na ngombwa ko duteza imbere n’abatoza kuko ntabwo umukinnyi ashobora gutera imbere adafite umutoza... Kugeza ubu abatoza dufite urwego bariho, bashobora gutoza amakipe yo mu cyiciro cya mbere n’icya kabiri ndetse baranayatoza, ariko na bo hari urwego batarageraho...”

Mu itangazo iyi Minisiteri yashyize ahagaragara rigashyirwaho umukono n’umunyamabanga wayo uhoraho, Lt. Col Rugambwa Patrice, ntabwo mu by’ukuri berekana ko hari ikinyamakuru cyatangaje ibinyoma ngo kibeshyere Minisitiri, ahubwo bagaragaza ko abantu babifashe uko bitari, ariko amagambo yaciye mu bitangazamakuru nabo niyo bashimangira, wenda bigatandukanira ku isesengura abayumvise bayakoreye.

Ababashije kubona iri tangazo, byatumye bagira urujijo n’amayobera ku cyo Minisiteri igaragaza cyavuzwe nabi ndetse n’isura yindi yihariye bifuza ko byahabwa, kuko amagambo bagaragaza ubwabo ari nayo yatangajwe mu binyamakuru.

Umwe yagize ati: "Ntangajwe no kubona ’quotes’ bashyizemo babihakana, ntaho zitandukaniye n’ibyanditswe mu binyamakuru, n’ubusanzwe ubisoma agasesengura arasanga ibyo bahakana ahubwo yarabivuze."

Undi nawe tutari butangaze amazina yagize ati: " MINISPOC iramagana ibyatangajwe n’itangazamakuru, ko Minisitiri w’umuco na Siporo Uwacu Julienne yabwiye abadepite ko abatoza bo mu Rwanda nta bushobozi baragira bwo gutoza Amavubi. Ngo ibinyamakuru byanditse ibinyoma... Ibinyamakuru byabyanditse byabikuyehe ra?... Gusa numvise ijwi ryafashwe, ndumva nta kubeshya kwabayeho, ahubwo ibyatangajwe muri iri tangazo n’ibiri muri iri jwi byose numvise ari kimwe."


Tanga Igitekerezo
Ibitekerezo 4
jeremie Kuya 17-06-2016

ariko ibyo minister yavuze ntiyabeshye!!cyakora ahubwo wakwibaza uti abo banyamahanga bazana bo kobakubitwa bashoboye bakayiha abanyarwanda ko gutsindwa bitabananira,byibuze imisoro yacu bakayirya nabo.

nkunda Kuya 17-06-2016

Yabivuga atabivuga abatoza bo mu rwanda bari hasi cyane pe! Yewe uretse no gukandira hano mu rwanda ahandi wumvise bajya nihe?
Bavuga ibigoramye imihoro ikarakara. Amakipe mutoza se iyari yarenga umutaru mu marushanwa yo hanze ni iyihe?
Mugabanye amagambo!
Niba mwarakaye cyo mugende mujye gutoza mu bwongereza dore ukwa 8 kwageze!

Kalisa Kuya 16-06-2016

Ati wimpa ijambo sha! Nkagira uwo nkomeretsa!

nkubito Kuya 16-06-2016

ahaha ijambo nikintu kibi cyane kugeza nubu sindabona aho ikosa riri ibyavuzwe ninabyo bisubiwemo ariko nyine ntakundi umuriribyi wumuhanga yarariribye ati wimpa ijambo reka ndekere aha ngiye kuvuga ibyamavubi nageza ejo.

IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA