Champions League: Real Madrid izahura na Atletico Madrid mu mukino w’amateka

Chief Editor | 5-05-2016
Champions League: Real Madrid izahura na Atletico Madrid mu mukino w’amateka

Nyuma y’uko ikipe ya Atletico Madrid yari yabashije kugera ku mukino wa nyuma wa Champions League kuwa kabiri tariki ikuyemo Bayern Munich yo mu Budage, ikipe ya Real Madrid zikomoka mu mujyi umwe nayo yabashije kugera ku mukino wa nyuma isezereye Manchester City yo mu Bwongereza, mu mukino wabaye kuri uyu wa Gatatu tariki 4 Gicurasi 2016.

Si ubwa mbere Real Madrid na Atletico zigiye guhurira ku mukino wa nyuma wa Champions League, kuko no mu mwaka wa 2014 zahuye, Real Madrid ikabasha gutsinda bigoranye. Ni amakipe afitanye amateka akomeye, imikino yayahuje iba irimo ishyaka no guhangana bidasanzwe, cyane ko ari amakipe akomoka mu mujyi umwe wa Madrid wo muri Esipanye.

Real Madrid ikozwa na Zinedine Zidane wahoze ayikinira, irashaka gutsinda Atletico Madrid ngo ikomeze ishimangire ubuhangange bwayo mu gihe Atletico Madrid itozwa na Diego Simeone nawe wahoze ayikinira, ishaka kwishyura iyi kipe y’abakeba yabatwaye igikombe muri 2014 bigoranye. Uyu mukino, uzaba ari uw’amateka, dore ko n’ubusanzwe imikino ihuza aya makipe yombi iba itoroshye.

Umukino wa mbere aya makipe yakinnye, hari mu gikombe cya Copa del Rey cyo mu 1928, icyo gihe Real Madrid ikaba yaratsinze ibitego 3-0. Umukino aya makipe aheruka gukina, wari uwa shampiyona y’iwabo muri Esipanye wabaye tariki 27/02/2016, Atletico ikaba yarabashije gutsinda 1-0. Uyu mukino wa UEFA Champions League ugiye kongera kubahuza, uzaba tariki 28 z’uku kwezi kwa Gicurasi 2016.

KANDA HANO UREBE VIDEOS UTASANGA AHANDI