Europa League: Liverpool yatsinze ishyira mu kaga Man City, Man U na Arsenal

Chief Editor | 6-05-2016
Europa League: Liverpool yatsinze ishyira mu kaga Man City, Man U na Arsenal

Mu mikino y’igikombe cy’amakipe yo ku mugabane w’u Burayi kizwi nka Europa League yabaye kuri uyu wa Kane tariki 5 Gicurasi 2016, ikipe ya Liverpool yo mu gihugu cy’u Bwongereza yabonye intsinzi ihita igera ku mukino wa nyuma, ibi bikaba byongereye ibyago ku ikipe imwe yo mu Bwongereza hagati ya Arsenal, Manchester United na Manchester City, kuko Liverpool nitwara igikombe bizatuma imwe muri zo itazitabira imikino ya UEFA Champions League yo mu mwaka w’imikino utaha.

JPEG - 166.1 kb

Ikipe ya Liverpool yishimiye kugera ku mukino wa nyuma wa Europa League

Imikino ya kimwe cya kabiri cya Europa League yabaye kuri uyu wa Kane, ni uwa Liverpool yatsinze Villarreal yo muri Esipanye ibitego 3-0, mu gihe mu mukino wo kwishyura Villarreal yari yabashije gutsinda Liverpool 1-0, bityo igiteranyo cy’ibitego kikaba cyabaye 3 bya Liverpool kuri 1 cya Villarreal, Liverpool ihita igera ku mukino wa nyuma.

Indi kipe yabonye itike yo kuzakina umukino wa nyuma ikesurana na Liverpool, ni Sevilla yabashije gusezerera Shakhkar Donetsk nyuma yo kuyitsinda ibitego 3-1, mu gihe mu mukino ubanza zari zabashije kunganya ibitego 2-2.

Umukino wa nyuma wa Europa League, uzahuza Liverpool na Sevilla tariki 18 z’uku kwezi kwa Gicurasi, Liverpool iramutse yegukanye igikombe ikaba yahita ibona amahirwe yo kuzitabira amarushanwa ya Champions League y’umwaka utaha, dore ko ubusanzwe mu Bwongereza hagenda amakipe 4 ya mbere ariko kwegukana iki gikombe bikaba byahita biha Liverpool uburenganzira bwo gusimbura ikipe izarangiza shampiyona iri ku mwanya wa kane, n’ubwo Liverpool yo ubu iri ku mwanya wa 8 ku rutonde rwa shampiyona ibura imikino ibiri kuri kipe ngo isozwe n’ubwo hari amwe mu makipe abura imikino itatu.

JPEG - 353.1 kb

Amakipe yo mu Bwongereza arimo imwe ishobora guhombera mu kwitwara neza kwa Liverpool

Ikipe zishobora kwegukana umwanya wa kane kugeza ubu, ni Arsenal iri ku mwanya wa gatatu n’amanota 67, Manchester City iri ku mwanya wa kane n’amanota 64, Manchester United iri ku mwanya wa gatanu n’amanota 60 ariko izihamye umukino, ndetse na Westham United iri ku mwanya wa gatandatu n’amanota 59 nayo ikaba izigamye umukino. Izi zose, bitewe n’uko zizitwara mu mikino micye isigaye, izajya ku mwanya wa kane ntacyo bizayimarira mu bijyanye no kwitabira Champions League, mu gihe Liverpool izaba yabashije kwegukana igikombe cya Europa League.

KANDA HANO UREBE VIDEOS UTASANGA AHANDI