AMAKURU

UKWEZI

Abanyamakuru Aimé na Rose Nishimwe batangiye intambwe yo kurushinga - Amafoto

Abanyamakuru Aimé na Rose Nishimwe batangiye intambwe yo kurushinga - Amafoto
19-06-2016 | By Chief Editor | Yasomwe n'abantu 10530 | Ibitekerezo 4

Ku mugoroba wo kuri uyu wa Gatandatu tariki 18 Kamena 2016, nibwo umunyamakuru Aimé Ndayisenga wa TV10 na Radio 10, yambitse impeta ishimangira urukundo akundana n’umunyamakuru wa Royal TV, Rose Nishimwe, imbere y’inshuti n’abavandimwe bahita banemeranywa kuzarushinga.

Kuri uyu wa Gatandatu, wari umunsi w’isabukuru y’amavuko y’imyaka 25 kuri Rose Nishimwe, ndetse yitabiriye ibirori by’isabukuru ye byari byateguwe na Aimé Ndayisenga bamaze igihe kirekire bakundana. Ibyari ibirori by’isabukuru ariko byaje no kuvamo ibindi birori bihambaye, ubwo Aimé Ndayisenga yacaga bugufi, agatera ivi ubundi agasaba umukunzi we ko bazibanira, undi abyemera nta kuzuyaza.

Ibirori byatangiye ari iby’isabukuru, aha Aimé na Rose bakataga umutsima

Umunyamakuru Rose Nishimwe, yujuje imyaka 25 kuri uyu wa Gatandatu

Nyuma yo kubwirwa "Yego", Aimé Ndayisenga yahise yambika Rose Nishimwe impeta ku rutoki rusumba izindi, nk’ikimenyetso ko ari we mukobwa usumba abandi bose mu buzima bwe, baba bahamije imbere y’inshuti n’abavandimwe ko mu gihe cya vuba bagiye gukora ubukwe bagasezerana kubana akaramata.

Urutoki rwa musumbazose rwa Rose rwambitswe impeta na Aimé Ndayisenga

Inshuti zabo ziganjemo abo bahuje umwuga zitabiriye ibi birori byaranzwe n’ibyishimo

Nyuma y’ibi birori byitabiriwe na bagenzi babo benshi b’abanyamakuru, Aimé Ndayisenga yatangarije Ikinyamakuru Ukwezi.com ko bateganya gukora ubukwe mu mezi macye ari imbere ariko akaba atahita ashyira hanze amatariki y’ubukwe bwabo kuko ataremezwa mu buryo ntakuka, akazajya hanze mu minsi iri imbere.

Aimé Ndayisenga umaze imyaka 6 mu itangazamakuru, yaritangiriye kuri Radiyo y’abaturage ya Nyagatare muri 2010, muri 2011 akomereza kuri Radio Salus, ahava yerekeza kuri Radio 10 mu mpera za 2011 ndetse guhera muri 2013 kugeza ubu akora icyarimwe kuri Radio 10 na TV10. Umukunzi we Rose Nishimwe yatangiriye itangazamakuru kuri Radio Salus, ahava ajya kuri Lemigo TV yaje guhinduka Royal TV aho akora mu ishami ry’amakuru.

Mu minsi iri imbere bazakora ubukwe basezerane kuzabana akaramata


Tanga Igitekerezo
Ibitekerezo 4
munoono Kuya 29-06-2016

ariko ubundi ibibyo gupfukama mwabinantujehe ko mbona ibyinshi urubyiruko dukora biba ari ibyiganano?

Siku Kuya 21-06-2016

Toutes mes félicitations Aimé , muzagire urugo ruhire

gatsata Kuya 20-06-2016

ngukunze ntakuzi mwa izo bazita inganzwa nubona umwanya uzampamagare

Nziza Kuya 19-06-2016

Plus upfukamira umukobwa mutarabana ngo yemere ko muzabana,plus uzanamupfukamira mu rugo,ndabikubwiye kandi uzabibona.ubundi abakobwa nibo bakwiriye gupfukama basaba urugo kuko ubu bari kuribwa gusa badashyirwa mu rugo !

IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA